काठमाडौँ । सिटिजन्स बैंकका डेपुटी सीईओ पारस कुमार काफ्लेको अन्त्येष्टि गरिएको छ । हृदयघातका कारण निधन भएका काफ्लेको शनिबार अन्त्येष्टि गरिएको हो ।

बैंकिङ फाइनान्स एन्ड इन्स्योरेन्स अफ नेपाल (बिफिन)को कार्यक्रममा सहभागी हुन भन्दै श्रीलंका गएका काफ्लेको हृदयघातका कारण जेठ २० गते (गत आइतबार) श्रीलंकामै निधन भएको थियो ।

बैंकका एक उच्च अधिकारीका अनुसार श्रीलंकामै हुँदा अचानक मुटु दुख्ने समस्या देखिएपछि उनलाई अस्पताल लगिएको थियो । श्रीलंकाको कोलम्बोस्थित नवलोक अस्पतालले काफ्लेलाई आइतबार दिउँसो ४ बजे मृत घोषणा गरेको थियो । निधनपछि नेपाल ल्याइएका काफ्लेको शनिबार नेपालमै अन्त्येष्टि गरिएको छ । 

विगत लामो समयदेखि सिटिजन्स बैंकमै कार्यरत उनी ट्रेड फाइनान्स, क्रेडिट अपरेशन, रिलेशनसिप म्यानेजमेन्ट, अपरेशनल रिस्क म्यानेजमेन्ट एन्ड कम्प्लाइन्स लगायतका विषयमा अब्बल थिए । पछिल्लो समय उनी बैंकको काममा औसत समयभन्दा बढी सक्रिय थिए । काठमाडौंको रातोपुल बस्ने काफ्लेका श्रीमती र दुई छोरा छन् ।