">
काठमाडौँ । नेपाल आयल निगमले पेट्रोल, डिजल र मट्टीतेलको मूल्य घटाएको छ । निगमले आइतबार बिहान १ बजेदेखि लागू हुनेगरि पेट्रोलियम पदार्थको मूल्य घटाएको हो ।
निगमको नयाँ मूल्य अनुसार पेट्रोलमा प्रतिलिटर ३ रुपैयाँ र डिजल तथा मट्टीतेलमा प्रतिलिटर एक रुपैयाँ घटेको छ ।
इन्डियन आय कर्पोरेसनबाट प्राप्त नयाँ खरिदमूल्यका आधारमा शनिबार बसेको निगमको सञ्चालक समितिको बैठकले आइतबारदेखि लागू हुनेगरि नेपाल आयल निगमले नेपालमा पेट्रोलियम पदार्थको नयाँ मूल्य तोकेको हो । मूल्य घटेपछि काठमाडौँ, पोखरा र दिपायल वरपर पेट्रोलको मूल्य प्रतिलिटर १६५ कायम भएको छ ।
त्यस्तै, डिजल र मट्टीतेलमा काठमाडौँ, पोखरा र दिपायल वरपर प्रतिलिटर १५२, सुर्खेत र दाङ वरपर १५१ र चारआली, विराटनगर, जनकपुर, अमलेखगञ्ज, भलबारी, नेपालगञ्ज, धनगढी र वीरगञ्ज वरपर १४९ रुपैयाँ कायम भएको छ ।
