काठमाडौँ । बैशाख महिनामा सेयर धितो कर्जा प्रवाह घटेको छ । नेपाल राष्ट्र बैंकले सार्वजनिक गरेको तथ्यांकअनुसार बैशाख महिनामा मात्रै सेयर धितो कर्जा २३ करोड २० लाख रुपैयाँले घटेको हो ।
राष्ट्र बैंकका अनुसार चैत मसान्तसम्म बैंकिङ प्रणालीबाट ८६ अर्ब १८ करोड रुपैयाँ सेयर धितो कर्जा प्रवाह भएको थियो । तर, बैशाख मसान्तसम्म उक्त कर्जा ८५ अर्ब ९५ करोड रुपैयाँमा झरेको छ ।
यसो त गतवर्ष असार मसान्तसम्म बैंकिङ प्रणालीबाट कुल ७६ अर्ब ३० करोड रुपैयाँ बराबरको सेयर धितो कर्जा प्रवाह भएको थियो । गतवर्षको तुलनामा पछिल्लो १० महिनामा सेयर धितो कर्जा प्रवाह १२.६४ प्रतिशतले बढेको छ ।
यद्यपि यो अपेक्षा अनुसार नभएको सेयर लगानीकर्ताहरुले बताएका छन् । सेयर लगानीकर्ताका अनुसार नेपाल राष्ट्र बैंकले सेयर धितो कर्जामा लगाएको ‘क्याप’का कारण पनि सेयर धितो कर्जा बढ्न नसकेको लगानीकर्ताको भनाई छ । आगामी मौद्रिक नीतिमार्फत राष्ट्र बैंकले सेयर धितो कर्जामा लगाएको ‘क्याप’ हटाए सेयर धितो कर्जा प्रवाह वृद्धि हुने लगानीकर्ताको भनाई छ ।
सेयर बजार चलायमान बनाउनका लागि भए पनि सेयर धितो कर्जामा लगाइएको ‘क्याप’ हटाउन लगानीकर्ताले माग गरेका छन् । उनीहरुले राष्ट्र बैंकसँग सेयर कर्जामा लगाइएको १५ करोडको ‘क्याप’ हटाउन र सेयर धितो कर्जाको जोखिम भार १०० प्रतिशतमा झार्न खास माग गरेका छन् । हाल राष्ट्र बैंकले गरेको व्यवस्था अनुसार सेयर धितो कर्जाको जोखिम भार १२५ प्रतिशत कायम गरिएको छ भने सेयर धितो कर्जाको सीमा व्यक्तिगतलाई १५ करोड र संस्थागतलाई २० करोड रहेको छ ।
