काठमाडौँ । काठमाडौँ महानगरपालिकाले न्युरोडको फुटपाथ विस्तारको काम रोकेको छ । फुटपाथ विस्तारको काममा स्थानीयले चर्को विरोध गरेपछि महानगरले काम रोकेको हो ।
न्युरोडको फुटपाथ विस्तारको काम रोक्दै महानगरले न्युरोड क्षेत्रसँगै अन्य क्षेत्रमा मंसिर २ गतेसम्म फुटपाथ विस्तार तथा निर्माणसम्बन्धी अन्य कुनै पनि काम नगर्ने सहमति गरेको छ ।
महानगर र स्थानीयबीच भएको सहमतिअनुसार फुटपाथ विस्तार तथा निर्माण कार्यले पारेको असर मूल्यांकन गर्न सुमनराज भण्डारीको संयोजकत्वमा कार्यदल तयार गरिएको छ । उक्त कार्यदलमा वडा नम्बर २२, २३, २४ का अध्यक्ष र २२ बाट विज्ञसहित महानगर निर्माण विभागका प्रमुख सुरज शाक्य सदस्य सचिव रहेका छन् ।
अब उक्त समितिले फुटपाथ विस्तारको अवाश्यकता र असरबारे अध्ययन गरी प्रतिवेदन मंसिर २ गते महानगरलाई बुझाउनेछ । सोही प्रतिवेदनका आधारमा महानगर अघि बढ्ने सहमति भएको छ ।
