काठमाडौँ । यसो त नाममा के नै हुन्छ र ? नाम धनबहादुर हुँदैमा मान्छे धनी हुन्छ भन्ने हुँदैन । मान्छे मनबहादुर हुँदैमा मान्छे मनको धनी हुन्छ भन्ने पनि हुँदैन । तर बजारमा यस्ता केही नामहरु भाइरल छन्, जसले बजारमा ठगी हुन्छ, लुट चल्छ, भनेकै ठाउँहरु सम्हालिरहेका छन् ।
केही समयअघि प्रहरी नायब उपरीक्षक ठग बहादुर केसी सेवाबाटै बर्खास्त भए । प्रहरी प्रधान कार्यालयको सिफारिसमा केसीलाई गृहमन्त्रीस्तरीय निर्णयबाट मंगलबार बर्खास्त गरिएको हो । प्रहरी प्रधान कार्यालयको आन्तरिक छानबिनबाट गम्भीर आचरण उल्लंघन गरेर प्रहरी ऐनविपरीत कार्य गरेको देखिएको भन्दै जागिरबाट हटाउन सोमबार गृह मन्त्रालयसमक्ष सिफारिस गरिएको हो । यसै पनि धेरैले ठग पुलिस भन्दै विभिन्न आरोप लगाउँदै आएका थिए । अन्तत: उनी सेवाबाटै बर्खास्त भए ।
केही समय अगाडि लुट बहादुर बुढाथोकीको नाम पनि चर्चामा थियो । उनी कर अधिकृत हुन् । कतिपय कर अधिकृतहरुले सेवाग्राहीलाई दुख दिएर लुट्ने गरेको भन्दै गुनासो आइरहेका बेला कर अधिकृतको नाम नै लुट बहादुर रहेको भन्दै सामाजिक सञ्जालमा उनको नेमप्लेट भाइरल भएको थियो । भलै नाम लुट बहादुर भए पनि उनी असल कर अधिकृतका रुपमा चिनिने उनी निकटहरु बताउँछन् ।
यसो त लुट बहादुर नाम सुन्दा अचम्म लागेपनि लुट बहादुर नाम गरेका धेरै मान्छे हाल सरकारी सेवामा छन् । यसअघि कोहलपुर नगरपालिकाका प्रमुख श्री लुट बहादुर रावत थियो । भलै यहाँका लुट बहादुर भने राम्रो छविका जनप्रतिनिधि मानिन्थे ।
अव ठग बहादुर र लुटबहादुरपछि बिकाउ कुमार यादव चर्चामा छन् । उनी नेपाल सरकारका उपसचिव हुन् । जति इमानदार भए पनि उनको नामकै कारण उनलाई उनका विरोधीहरुले गलत रुपमा चर्चामा ल्याइरहेका छन् ।
केही समय अगाडि नेपाली भाषामा अश्लील सुनिने तर विदेशी ब्राण्डहरुका नाम पनि चर्चामा थिए । सामाजिक सञ्जालमा हुने यस्ता चर्चाले नामकै कारण कतिपयले बदनामी खेप्नुपरिरहेको छ ।
