काठमाडौँ । सौर्य एयरलाइन्सको जहाज दुर्घटनामा परेका क्याप्टेन मनिष शाक्यको काठमाडौँ मेडिकल कलेज (केएमसी)मा उपचार भइरहेको छ । शाक्यको हाल आईसीयूमा उपचार भइरहेको अस्पताल स्रोतले बताएको छ । 

अस्पताल स्रोतका अनुसार शाक्यको आँखा र टाउकोमा चोट लागेको छ । यद्यपि उनी खतारमुक्त रहेको अस्पताल स्रोतले बताएको छ । 

बुधबार बिहान करिब ११ बजे काठमाडौँदेखि पोखरा जाने क्रममा विमानस्थलबाट ‘टेक अफ’ गर्ने बित्तिकै सौर्य एयरलाइन्सको जहाज दुर्घटनामा परेको थियो । जहाज दुर्घटनामा परी जहाजमा सवार १८ जनाको मृत्यु भएको नागरिक उड्डयन प्राधिकरणले पुष्टि गरेको छ । 

दुर्घटनामा परेको जहाजमा चालक दलसहित १९ जना सवार थिए । जहाज मर्मतका लागि पोखरा लगिँदै थियो । जहाजमा सवार सबैजना सौर्य एयरलाइन्सका कर्मचारी रहेको पनि प्राधिकरणले जनाएको छ ।