काठमाडौँ । पूर्वअर्थमन्त्री डा. प्रकाशशरण महतले दुई ठूला राजनीतिक दलहरु (एमाले-काँगेस) मिलेर सरकार बनाएकाले सेयर बजारमा उत्साह देखिएको बताएका छन् । संसद् भवनबाहिर सञ्चारकर्मीसँग कुरा गर्दै पूर्वअर्थमन्त्री महतले यस्तो बताएका हुन् ।
उनले मुख्य दुई राजनीतिक दल मिलेर बनेको सरकारप्रति जनताको अपेक्षा ठूलो रहेको उल्लेख गरेका छन् । सेयर बजारसँगै अब समग्र अर्थतन्त्रमा उत्साह देखिनुपर्ने महतको भनाई छ ।
उनले हाल बजारमा माग भन्दा सप्लाइ बढी भएकाले पनि समस्या देखिएकाले समस्या समाधान गर्ने गरी राष्ट्र बैंकले मौद्रिक नीति ल्याउन आवश्यक रहेको बताए । मौद्रिक नीतिमा ‘रिफर्म’ गर्नसक्ने ठाउँहरुमा ‘रिफर्म’ गरेर ल्याउनुपर्नेमा जोड दिएका छन् ।
पूर्वअर्थमन्त्री महतले सेयर बजार, घरजग्गा कारोबार लगायतका क्षेत्रमा कर्जा प्रवाहको लागि सिमाहरु कायम राखेर गरेको माइक्रोम्यानेजमेण्टलाई विचार गर्नु आवश्यक रहेको उल्लेख गरेका छन् । हाल बैंकको ब्याजदरमा सहजता आएकोले सेयर बजार र घरजग्गा कारोबारमा रहेका सिमाहरुलाई खुकुलो गर्नुपर्ने महतको भनाई छ । उनले कर्जामा अनुत्पादन क्षेत्र भनेर लगाएको सीमामा पनि पुनर्विचार गर्न आवश्यक रहेको उल्लेख गरेका छन् ।
