काठमाडौं। प्रधानमन्त्री पुष्प कमल दाहाल ‘प्रचण्ड’ले राजिनामा नदिने भएका छन्। प्रचण्डले प्रतिनिधिसभाबाट विश्वासको मत लिने भएका हुन् ।
पछिल्लो राजनीतिक समीकरण विकास भएसँगै मंगलबार बिहान बसेको नेपाल कम्युनिष्ट पार्टी (माओवादी केन्द्र)को पदाधिकारी बैठकमा पार्टी अध्यक्ष एवं प्रधानमन्त्री दाहालले विश्वासको मत लिने प्रक्रियाका लागि आवश्यक काम अघि बढाउने बताएका छन् ।
‘प्रधानमन्त्रीले संसद् ‘फेस’ गरेर विश्वासको मतको प्रस्तावमा जाने निर्णय भएको छ’, बैठकपछि माओवादी केन्द्रका सचिव देवेन्द्र पौडेलले भने ।
वर्तमान सत्ता समीकरणमा रहेका राष्ट्रिय स्वतन्त्र पार्टी, प्रमुख प्रतिपक्षी नेपाली कांग्रेसलगायत सबै दलसँग विश्वासको मतका सम्बन्धमा छलफल गर्ने निर्णय भएको उनले जानकारी दिए।
बैठकमा अध्यक्ष दाहालले पछिल्लो राजनीतिक विकासक्रमबारे प्रारम्भिक ‘ब्रिफिङ’ गरेको प्रवक्ता अग्निप्रसाद सापकोटाले जानकारी दिए ।
