काठमाडौँ । सेयर बजारका लगानीकर्ता रोहन कार्कीले चालु आर्थिक वर्षका लागि राष्ट्र बैंकले सार्वजनिक गरेको मौद्रिक नीति सकारात्मक रहेको बताएका छन् । मौद्रिक नीति सार्वजनिक भएपछि अर्थ सरोकारसँग कुराकानी गर्दै कार्कीले यसपालिको मौद्रिक नीति विगतको भन्दा धेरै लचिलो र बजारमैत्री आएको बताएका हुन् ।
उनले चालु आर्थिक वर्ष २०८१ ८२ का लागि राष्ट्र बैंकले ल्याएको मौद्रिक नीति अढाई वर्षपछिकै लचिलो भएको प्रतिक्रिया दिएका छन् ।
‘करिब अढाई वर्षपछि पहिलोपटक पूँजी बजार, लगानीकर्ता, व्यवसायी र अर्थतन्त्रमैत्री मौद्रिक नीति आएको छ । यसलाई आम लगानीकर्ताले सकारात्मक रुपमा लिएका छन् ।’, अर्थ सरोकारसँग कुराकानी गर्दै लगानीकर्ता कार्कीले भने, ‘मौद्रिक नीति र मौद्रिक नीतिले दिएको आत्मविश्वासले आगामी दिनमा बजारलाई थप उचाइमा पुर्याउन मद्दत गर्छ ।’
त्यस्तै, कार्कीले सेयर कर्जामा राष्ट्र बैंकले लगाएको ‘क्याप’को औचित्य नभएको भन्दै यो हटाउनैपर्ने व्यवस्था भएको बताएका छन् । यद्यपि यसपालिको मौद्रिक नीतिमा संस्थागततर्फ २० करोडको सीमा खारेज हुनु पनि बजारका लागि राम्रै कुरा भएको कार्कीको भनाई छ । ‘सेयर बजारमा ४ १२ वा १५ २० को सीमा आवश्यक नै छैन, दुवै खारेज गर्नुपर्थ्यो ।’, उनले भने, ‘तथापि अहिले संस्थागततर्फको सीमा खारेज भएको छ । यसले समग्रमा बजारमा राम्रै प्रभाव पर्छ ।’
कार्कीले फण्डामेन्टल्ली, टेक्निकल्ली र बजारका सम्पूर्ण इन्डिकेटरले सेयर बजारमा ‘बुल’ सुरु भइसकेको संकेत गरेको भन्दै बजारको ‘बुल’लाई मौद्रिक नीतिले सपोर्ट गर्ने बताएका छन् ।
साथै उनले बजारले उकालो गति तय गरिसकेको भन्दै अब सेयर बजारमा देखिने सानातिना करेक्सनबाट लगानीकर्ता आत्तिनु वा हौसिनु नपर्ने बताएका छन् ।
