काठमाडौँ । नेपाल धितोपत्र बोर्डका अध्यक्ष फेरिएका छन् । माओवादी नेतृत्वको सरकार ढलेपछि बिष्णु पौडेल अर्थमन्त्री बनेसँगै बोर्डको अध्यक्ष फेरिएका हुन् ।
यसअघि पूर्वअर्थमन्त्री वर्षमान पुनले नरेन्द्रकुमार रानालाई बोर्ड अध्यक्षमा नियुक्त गरेका थिए । उनी पुनका प्रिय पात्रसमेत हुन् । तर, विष्णु पौडेल अर्थमन्त्री बनेलगत्तै पौडेलले बोर्डको कामु अध्यक्षमा महेश बराललाई नियुक्त गरेका छन् । बराललाई अर्थमन्त्री पौडेलले पद तथा गोपनीयताको सपथ समेत गराएका छन् ।
बोर्डको अध्यक्ष पद रिक्त रहेको अवस्थामा धितोपत्र सम्बन्धी ऐन २०६३ अनुसार अर्थ मन्त्रालयबाट प्रतिनिधित्व गर्नेगरी बोर्डको अध्यक्षको हैसियतमा काम गर्ने गरी बराललाई बोर्ड अध्यक्षमा नियुक्त गरिएको हो ।
पद तथा गोपनीयताको शपथ गराउँदै अर्थमन्त्री पौडेलले बराललाई सुखद् कार्यकालको शुभकामना दिएका छन् । साथै सूचीकृत सङ्गठित संस्था तथा बजार सहभागीहरूको संस्थागत सुशासन, बोर्ड तथा बोर्डमा कार्यरत कर्मचारीको क्षमता अभिवृद्धि, बजारको विकास, विस्तार र स्थायित्वमा जोड दिन र सम्पूर्ण कर्मचारीहरूलाई तोकिए बमोजिमको जिम्मेवारी निर्भिकतापूर्वक सम्पादन गर्न अर्थमन्त्री पौडेलले निर्देशन दिएका छन् ।
