काठमाडौँ । नेपाल इन्भेष्टर्स फोरमका अध्यक्ष तुलसीराम ढकालले नयाँ सत्ता समीकरणले सेयर बजार सुध्रिने आश रहेको बताएका छन् । माओवादी नेतृत्वको सरकारले बजार सुधारका लागि खासै केही गर्न नसकेको भन्दै उनले एमाले र काँग्रेसबीचको नयाँ सत्ता समीकरणले बजार सुधारको पक्षमा राम्रो गर्ने अपेक्षा व्यक्त गरेका हुन् ।
अस्थिर रहेको सरकारलाई स्थिरता दिनेगरी भएको दुई ठूला राजनीतिक दलको समीकरण लगानीकर्तामा उत्साह देखिएको ढकालको भनाई छ । उनले राजनीतिक अनिश्चितताका कारण पूँजीबजारले गुमाएको आत्मविश्वास लयमा आउने विश्वास रहेको उल्लेख गरेका छन् । सेयर बजार मात्रै नभएर नयाँ समीकरणले उद्योगी व्यवसायी र समग्र निजी क्षेत्रलाईसमेत उत्साहित बनाएको ढकालले बताएका छन् ।
त्यस्तै, अध्यक्ष ढकालले २०७८ साल भदौ ८ गते राष्ट्र बैंकले ल्याएको मौद्रिक नीतिको प्रहारबाट सेयर बजार अहिलेसम्म माथि उठ्न नसकेको बताए । मौद्रिक नीतिको प्रहारबाट पुँजीबजार अहिलेसम्म १८ सयको सेरोफेरोमा रहेको बताउँदै अध्यक्ष ढकालले विगतमा राष्ट्र बैंकले लिएका सबै नीतिहरु आगामी मौद्रिक नीतिमा सच्याउनुपर्ने बताएका छन् । ‘राष्ट्र बैंकले पूँजी बजारमा लगाएको १५ २० करोडको सीमा पूर्णरुपमा हट्नुपर्छ ।’, उनले भने, ‘राष्ट्र बैंकले बैंकहरुलाई कोर क्यापिटलको ४० प्रतिशत लगानी गर्न दिने भनेपछि बैंकहरुले त्यही अनुसार गर्नुहुन्छ । पुँजीबजार जहिले पनि सुरक्षित हो ।’
त्यस्तै, पुँजीबजारको जोखिम भार १५० बाट अहिले १२५ मा कायम रहेको भन्दै त्यसलाई सय प्रतिशतमा ल्याउनुपर्नेमा ढकालले जोड दिएका छन् । उनले बैंकिङ र लघुवित्त सुधारको लागि र उद्योगी व्यवसायीहरुको मनोबल उच्च बनाउने गरी मौद्रिक नीति आउनुपर्नेमा जोड दिए । राष्ट्र बैंकले कर्जा सीमा पुरानै कायम गर्ने र जोखिम भार सय प्रतिशतमा ल्याए मात्रै पनि पुँजीबजार चलायमान हुनेमा ढकालले विश्वास व्यक्त गरेका छन् ।
