काठमाडौँ । अर्थमन्त्री विष्णु पौडेलले सेयर बजारमा चलखेल हुन नदिने बताएका छन् । शुक्रबार बसेको प्रतिनिधिसभा अन्तर्गतको अर्थ समितिको बैठकमा बोल्दै उपप्रधानमन्त्रीसमेत रहेका पौडेलले यस्तो बताएका हुन् ।

बैठकमा उनले सेयर बजार मुलुकको अर्थतन्त्रको आधारस्तम्भ रहेको भन्दै बजारलाई प्रभावित पार्ने खालका ‘इन्साइडर ट्रेडिङ’ रोक्न मातहतका निकायलाई निर्देशन दिइसकेको पनि बताएका छन् ।

त्यस्तै, अर्थमन्त्री पौडेलले सेयर बजारमा देखिएको सेयर किनबेचको समस्यालाई समेत अध्ययन गर्न निर्देशन दिएको जानकारी दिएका छन् । केही दिनअघि नेप्सेमा कारोबार समयमै लगानीकर्ताले सेयर बिक्री गर्न खोज्दा सेयर बिक्री प्रक्रिया सफल हुने तर खरिद गर्दा ‘अटो रिजेक्ट’ हुने समस्या देखिएको थियो । उक्त समस्याबारे चौतर्फी गुनासो बढेपछि सो विषयमा पनि आवश्यक अध्ययन गर्न निर्देशन दिएको अर्थमन्त्री पौडेलले बताएका छन् ।

साथै अर्थमन्त्रीले सेयर कारोबार गर्दा कम्पनीको वित्तीय अवस्थाको विश्लेषण गरेर मात्रै लगानी गर्न पनि सेयर लगानीकर्तालाई सुझाव दिएका छन् ।