काठमाडौँ । कैलालीका नदीमा डल्फिन देखिन थालेका छन् । नदीमा पानीको सतह बढेसँगै कैलालीको कर्णाली नदीका सहायक नदी मोहना, पथरिया, काँढा, कान्द्रा, गौरिनाला र रेप्तीनालामा डल्फिन देखिन थालेका हुन् ।
कैलालीका नदीमा देखिने डल्फिनलाई स्वाँसु, सुस र सोंस पनि भन्ने गरिन्छ । यो डल्फिन असार, साउन, भदौ र असोज महिनासम्म कैलालीका नदीमा देखिने गर्छ ।
झण्डै १० वर्षदेखि कैलालीका नदीमा देखिन थालेको डल्फिन वर्षायाम सुरु भएसँगै नदीमा देखिने गर्छन् । गत असारदेखि नदीमा डल्फिन देखिन थालेपछि डल्फिन हेर्नेहरुको भीड लाग्नेगरेको स्थानीयले बताएका छन् । विश्वको सबैभन्दा नजिकबाट डल्फिन अवलोकन गर्न सकिने कैलालीका नदीमा डल्फिन हेर्नकै लागि बाह्य तथा आन्तरिक पर्यटकहरु आउने गर्छन् ।
हाल कैलालीको मोहना, पथरिया नदीमा करिब ३० वटा डल्फिन रहेका छन् भने जसमध्ये करिब १२ वटा डल्फिनका बच्चा रहेका छन् । कैलालीका नदीमा भएका विश्वकै दुर्लभ डल्फिनको संरक्षणका लागि डल्फिन, जलचर तथा जैविक विविधता संरक्षण नेपाल स्थापना गरिएको छ । हाल उक्त समितिले कैलालीका नदीमा डल्फिन संरक्षणमा भूमिका खेल्दै आएको छ । तर, डल्फिन संरक्षणमा प्रयाप्त पहल भने हुन सकेको छैन । डल्फिनको आहारा माछा नै हो, तर कैलालीमा डल्फिन देखिने नदीमा ‘ओभर फिसिंग’को समस्या छ । अर्कोतर्फ डल्फिन संरक्षणमा सम्बन्धित निकायले खास चासो नदिंदा डल्फिन संरक्षणमा चुनौती देखिएको स्वयम् पर्यटकहरुले बताउने गरेका छन ।
कैलालीका नदीमा देखिएको डल्फिनलाई अर्थ सरोकारकर्मी कुलराज चौधरीले क्यामरामा कैद गरेका छन् । बाँकी फोटो फिचरमा हेर्नुहोस्ः
