काठमाडौँ । नेपाल दूरसञ्चार प्राधिकरणले दुई इन्टरनेट सेवा प्रदायकको अनुमतिपत्र (लाइसेन्स) खारेज गरेको छ । प्राधिकरणले वीरगञ्ज महानगरपालिका-८ पर्साको पर्सा टेलिकम्युनिकेसन प्रालि र काठमाडौँको इन्फोकम प्रालिको लाइसेन्स खारेज गरेको हो । 

लाइसेन्स नवीकरण गर्न तोकिएको अवधिभित्र निवेदन पेश नगरेपछि साउनको अन्तिम साता दुई सेवा प्रदायकको लाइसेन्स स्वतः खारेज भएको प्राधिकरणले जनाएको छ । 

लाइसेन्स खारेज भएको इन्फोकम प्रालिले प्राधिकरणबाट २०६५ असार १५ गते अनुमति पाएको थियो भने पर्सा टेलिकम्युनिकेसन प्रालिले २०७६ साउन २२ गते अनुमतिपत्र पाएको थियो । 

लाइसेन्स खारेज भएसँगै प्राधिकरणले दुवै कम्पनीलाई अडिटेड वित्तीय विवरणअनुसार तिर्न बाँकी पर्ने ग्रामीण दूरसञ्चार विकास कोष तथा रोयल्टी दस्तुर बापतको रकम छिटो तिरेर सम्पर्क गर्न भनेको छ ।