काठमाडौँ । नबिल बैंकले गत आर्थिक वर्षको चौथो त्रैमाससम्ममा वाणिज्य बैंकहरुमध्येकै सबैभन्दा धेरै नाफा कमाएको छ । बैंकले सार्वजनिक गरेको असार मसान्तसम्मको अपरिस्कृत वित्तीय विवरणअनुसार बैंकले कुल ७ अर्ब ६ करोड रुपैयाँ खुद नाफा आर्जन गरेको छ । जुन, अघिल्लो आर्थिक वर्षको सोही अवधिमा तुलनामा १०.२३ प्रतिशत बढी हो । अघिल्लो आर्थिक वर्षको सोही अवधिमा बैंकले ६ अर्ब ४० करोड रुपैयाँ खुद नाफा आर्जन गरेको थियो ।

यसअवधिमा बैंकको खुद ब्याज आम्दानी घटे पनि इम्पेयरमेन्ट चार्ज घटेका कारण बैंकको नाफा बढेको हो ।

बैंकले सार्वजनिक गरेको वित्तीय विवरण अनुसार असार मसान्तसम्म बैंकको खुद ब्याज आम्दानी ८.६९ प्रतिशत घटेको छ । यसअवधिमा बैंकको खुद फि तथा कमिसन आम्दानी १२.०४ प्रतिशत बढेको छ भने बैंकको कुल सञ्चालन आम्दानी ६.०२ प्रतिशत घटेको छ । त्यस्तै, यसअवधिमा बैंकको सञ्चालन मुनाफा ६.५१ प्रतिशतले बढेको छ ।

समीक्षा अवधिमा बैंकको खराब कर्जा १.१८ प्रतिशतबाट घटेर १.०७ प्रतिशतमा झरेको छ । खराब कर्जा घटेसँगै बैंकको इम्पेयरमेन्ट चार्ज पनि घटेर ३ अर्ब २२ करोड रुपैयाँमा सिमित भएको छ ।

त्यस्तै, असार मसान्तसम्ममा बैंकको नाफासँगै प्रतिसेयर आम्दानी (ईपीएस) पनि बढेको छ । यसअवधिमा बैंकको ईपीएस २ रुपैयाँ ४२ पैसाले बढेर २६ रुपैयाँ ९ पैसा पुगेको छ । यसअवधिमा बैंकको प्रतिसेयर नेटवर्थ २२० रुपैयाँ १६ पैसा भने मूल्य आम्दानी अनुपात २०.०८ गुणा छ भने बैंकको वितरणयोग्य मुनाफा ३ अर्ब ८५ करोड रुपैयाँ छ ।

हाल कुल चुक्ता पूँजी २७ अर्ब ५ करोड रुपैयाँ रहेको नबिल बैंकको जगेडा कोषमा ३२ अर्ब ५१ करोड रुपैयाँ सञ्चित छ ।