धुलिखेल । प्रधानमन्त्री केपी शर्मा ओलीले काभ्रेको धुलिखेलस्थित काठमाडौँ विश्वविद्यालयले नेपालमा पहिलो पटक ल्याइएको ‘हाइड्रोजन कार’ र रिफ्युलिङ प्रणालीको आज शुभारम्भ गरेका छन् । विश्वविद्यालयको २९औं दीक्षान्तअघि सो `हाइड्रोजन कार’ र रिफ्युलिङ प्रणालीको शुभारम्भ भएको हो ।
कोरियामा बनेको हुण्डाइ कम्पनीको हाइड्रोजन कार विश्वविद्यालयले नेपाल आयल निगमको सहयोगमा ३३ हजार अमेरिकी डलरमा खरिद गरी नेपाल ल्याइएको हो । प्रधानमन्त्री ओलीले संक्षिप्त प्रतिक्रिया दिँदै हाइड्रोजनको प्रयोगबाट कार्बन उत्सर्जन कमी भइ प्रदूषण कम गर्न सहयोग हुने बताए ।
नाडा अटो शोलाई ‘झापड’ !
यसो त सो कारको कुनै न कुनै रुपमा नाडा अटो शोमा उद्घाटन गर्नेगरी व्यवस्था गर्न नाडाका केहि अधिकारीहरुले पहल सुरु गरेका थिए । तर प्रधानमन्त्री नाडा अटो शोमा नजाने र प्रधानमन्त्री नै आउने भएपछि विश्वविद्यालयमै उद्घाटन गर्दा राम्रो हुने भन्दै विश्वविद्यालयका केहि अधिकारीहरुले नाडाका प्रतिनिधिहरुलाई ‘नो’ भनेका थिए ।
