काठमाडौँ । काठमाडौँको भृकुटीमण्डपमा चलिरहेको नाडा अटो शोमा बिवाईडीले ‘राष्ट्रघाती हर्कत’ प्रदर्शन गरेको छ । नेपालको नक्साबाट लिम्पियाधुरा र कालापानीको नक्सा नै गायब बनाएर कम्पनीले यस्तो हर्कत गरेको हो । शोको मूलगेट अगाडी नै कम्पनीले नेपालको पूरानो नक्सा प्रदर्शन गरेर आफ्नो कम्पनीले वितरण गरिरहेको गाडीका स्वरुमका ठेगानाहरु प्रदर्शन गरिरहेको छ । नाडा अटो शोमा पुगिरहेका थुप्रैले यस विषयमा आवाज उठाए पनि कम्पनी र नाडाले यसलाई हटाउन नमान्दा कम्पनी र स्वयम् नाडा अटो शो आयोजकको नियतमाथि नै प्रश्न उठेको छ ।
विवाईडीका कर्मचारीले भने आफुहरुलाई यस विषयमा थाहा नै नभएको दाबी गरेका छन् । ‘किन पूरानो नक्सा राखेको ? यो त राष्ट्रघाती काम भएन र ?’ अर्थ सरोकारको प्रश्नमा बिवाईडीको स्टलमा भेटिएका कर्मचारीले सबै काम माथिको आदेश र एजेन्सीमार्फत भएकाले यस विषयमा आफुहरुलाई केहि पनि थाहा नभएको दाबी गरेका छन् ।
नाडाका एक अधिकारीले भने आफुले पनि सो ब्यानर हटाउन आग्रह गरे पनि कम्पनीले लगाईसकेको ब्यानर हटाउन नमानेको गुनासो गरेका छन् । ‘मैले सो ब्यानर हटाएर अर्को राख्नु भनेको हुँ । तर कम्पनीले राखिसकेको ब्यानर नहटाउने भन्यो । नाडाकै साथीहरुले कसले याद गर्छ र भन्ने शैलीमा कुरा गर्नुभयो । तर जे भयो, गलत भएको छ ।’ ती अधिकारीले भने ।
यता काठमाडौँ महानगरपालिकाले पनि आफुलाई यस विषयमा थाहा नभएको र उजुरी आए एक्सन लिने बताएको छ । ‘हामीलाई अहिलेसम्म यस विषयमा कुनै पनि जानकारी वा उजुरी आएको छैन ।’ काठमाडौँ महानगरपालिकाका एक अधिकृतले अर्थ सरोकारसँग भने, ‘हामीलाई उजुरी आएको खण्डमा हामी तत्काल एक्सनमा उत्रनेछौँ । तपाईंले जानकारी दिनुभयो, यस विषयमा बुझ्छौँ ।’
काठमाडौँको भृकुटीमण्डपमा भदौ ११ गतेदेखि नाडा अटो शो चलिरहेको छ । गत साल पनि अर्को एक कम्पनीले यस्तै राष्ट्रघाती हर्कत गरेको खबर अर्थ सरोकारले सार्वजनिक गरेपछि सो कम्पनीले आफ्नो हर्कत सच्याएको थियो ।
केपी शर्मा ओलीको पहलमा केहि बर्ष अघि नै नेपालको राजनीतिक नक्सा परिवर्तन गरिएको थियो । राजपत्रमै उल्लेख भईसकेको विषय भएकाले नेपालको नक्साको गलत प्रयोग वा गलत नक्साको प्रयोग गैरकानुनी मानिन्छ । बिवाईडीले गरेको यो हर्कतमा भने धेरैले बिवाईडीको नियत नै गलत भएको आशंका गरेका छन् ।
