काठमाडौँ । प्रधानमन्त्री केपी शर्मा ओलीले टिकटक खुलाउने तयारी गरेका छन् । सुरुदेखि नै टिकटकमाथिको प्रतिबन्ध खोल्ने पक्षमा रहेको ओलीले अन्ततः प्रतिबन्ध हटाउने तयारी गरेका हुन् ।
प्रधानमन्त्री निकट स्रोतका अनुसार ओलीले यस विषयमा आवश्यक प्रक्रिया अगाडि बढाउन संचारमन्त्री पृथ्वीसुब्बा गुरुङलाई निर्देशन दिइसकेका छन् । योसँगै अब सञ्चारमन्त्री गुरुङले आगामी मन्त्रिपरिषद्को बैठकमा टिकटकमाथिको प्रतिबन्ध हटाउन प्रस्ताव गर्नेछन् ।
त्यसलगत्तै मन्त्रिपरिषद्को निर्णयबाट सरकारले टिकटकमाथि लगाइएको प्रतिबन्ध हटाइएको औपचारिक घोषणा गर्ने प्रधानमन्त्रीनिकट स्रोतले दाबी गरेको छ ।
यसो त यसअघि तत्कालीन प्रधानमन्त्री पुष्पकमल दाहाल (प्रचण्ड) नेतृत्वको सरकारले टिकटकमाथि प्रतिबन्ध लगाउने निर्णय गरेको थियो । टिकटकको प्रयोगले सामाजिक सद्भाव बिगारेको भन्दै तत्कालीन सरकारले २०८० कात्तिक २७ गते क्याबिनेट मिटिङबाटै टिकटकमाथि प्रतिबन्ध लगाउने निर्णय गरेको थियो । तर, टिकटकमाथि प्रतिबन्ध लगाउने सरकारको निर्णय संविधानले सुनिश्चित गरेको अभिव्यक्ति स्वतन्त्रता र सञ्चारको हक विपरीत भएको भन्दै सर्वोच्च अदालतमा १४ वटा छुट्टाछुट्टै रिट दर्ता भएका थिए । जुन रिटमाथि छलफल गर्न सरकारले आगामी असोज १० गते नयाँ पेशी तोकेको छ ।
यता टिकटकले पनि सञ्चार तथा सूचना मन्त्रालयलाई पत्र नै लेखेर नेपाल सरकारले निर्धारण गरेको मापदण्ड पालना गर्न तयार रहेको भन्दै टिकटकमाथिको प्रतिबन्ध फुकुवा गर्न आग्रह गरेको छ ।
सोही अनुरुप प्रधानमन्त्री केपी शर्मा ओली नेतृत्वको सरकारले आवश्यक मापदण्ड पालना गर्ने सर्तमा टिकटकमाथिको प्रतिबन्ध फुकुवा गर्नेछ । हाल नेपालमा टिकटकमाथि प्रतिबन्ध लगाइएको भए पनि टिकटक युजरहरुले डिएनएस सेटिङ तथा भिपिएन प्रयोग गरेर टिकटक चलाउँदै आएका छन् । तर, अब टिकटकमाथिको प्रतिबन्ध हटेसँगै नेपालमा सबै नेटवर्कमा टिकटक निर्वाध रुपमा चल्नेछ ।
