काठमाडौँ । अविरल झरीले प्रभावित भएको आन्तरिक उडान पुनः सुचारु भएपछि एयरपोर्टमा यात्रुको थेगिनसक्नु भीड लागेको छ ।
लगातारको झरीका कारण मौसममा आएको खराबीपछि तीन दिनसम्म रोकिएको आन्तरिक उडान सुचारु भएपछि काठमाडौँको त्रिभुवन अन्तराष्ट्रिय विमानस्थलमा यात्रुहरुको भीड लागेको हो ।
अन्य दिनहरुमा यात्रुहरुको ठिकठाक उपस्थिति हुने त्रिभुवन अन्तराष्ट्रिय विमानस्थलको आन्तरिक टर्मिनल भवनमा अहिले भने पार्किङ एरियादेखि नै लाइन छ । यात्रुहरुको अत्याधिक चापका कारण विमानस्थलमा चेकिङ तथा सुरक्षा जाँचमा कठिनाइ भएको विमानस्थलले जनाएको छ ।
यता आइतबार मात्रै आन्तरिकतर्फका १ सय ५६ वटा उडान र सोही संख्यामा अवतरण गरेको विमानस्थलका प्रवक्ता रिन्जी शेर्पाले बताएका छन् । शेर्पाका अनुसार ३ दिनसम्म कुनै पनि उडान नहुँदा यात्रुको चाप बढेको हो । सोमबार पनि बिहानैदेखि विमानस्थलमा यात्रुहरुको भीड लागेको छ । बाँकी तस्विरमा हेर्नुहोस्ः
