काठमाडौँ । ग्यालेक्सी फोके टेलिभिजन संचालन गर्ने गोर्खा मिडिया प्रा.लि. ले घर भाडा नतिरेको पाइएको छ । गोर्खा मिडियाले १० महिनादेखिको घर भाडा नतिरेको पाइएको हो ।
उक्त मिडियाले घरभाडा नतिरेपछि घरधनीले घर खाली गर्न महानगरमा निवेदन दिएका छन् । घरधनी मृगेन्द्रप्रसाद मिश्रका अनुसार २०७७ साल भदौ २५ गते मिडियाका तत्कालीन अध्यक्ष छविलाल जोशीले १० वर्षका लागि मासिक दुई लाख ५० हजार रुपैयाँ घर भाडा तिर्ने गरी सम्झौता गरेका थिए ।
पछि सञ्चालक फेरिएर गितेन्द्र बाबु (जीबी) राईले पुनः सम्झौता गरेका थिए । हाल उनी सहकारी ठगी प्रकरणमा फरार छन् ।
गोर्खा मिडियाले २०८० मङ्सिरसम्म नियमित घरभाडा बुझाउँदै आएको थियो । त्यसयता, मिडियाले घर भाडा बुझाएको छैन ।
घर भाडा नबुझाए पछि घरधनी मृगेन्द्रप्रसाद मिश्रले जेठ १६ गते महानगरपालिकाको वडामा घर खाली गराउन उजुरी दिएका थिए । उक्त उजुरी वडाबाट कार्यान्वयन हुन नसकेपछि साउन २ गते महानगरपालिकामा पठाइएको थियो । त्यसपछि महानगरपालिकाको न्यायिक समितिमा ७ साउनमा घरबेटी वादीका रूपमा राखेर मुद्दा दर्ता भएको थियो ।
मुद्दा दर्ता भएपछि महानगरपालिकाले उक्त घरमा ७ दिनको सूचना टाँसेको थियो । सूचना टाँसे पछि पनि ग्यालेक्सी फोरकेका कोहि पनि सम्पर्कमा नआएपछि पुन: महानगरपालिकाको न्यायिक समिति इजलासले पत्रिकामा सूचना निकाल्न आदेश दिएको थियो ।
यति गर्दा समेत अहिलेसम्म पनि महानगरमा घरभाडा सम्बन्धी छलफल गर्न ग्यालेक्सी फोर केको कोही पनि सम्पर्कमा नआउँदा घरधनी चिन्तित भएका छन् । ग्यालेक्सी फोर केले १० महिनाको कुल २५ लाख बढी घर भाडा तिर्न बाँकी छ ।
