काठमाडौँ । समस्याग्रस्त घोषणा भइसकेको सिभिल सेभिङ एण्ड कोअपरेटिभका संस्थापक अध्यक्ष इच्छाराज तामाङले बचतकर्ताको पैसा ३ वर्षभित्र फिर्ता गर्ने बताएका छन् । सहकारी संस्था बचत रकम दुरुपयोग सम्बन्धमा संसदीय छानबिन समितिसँगको बयानमा तामाङले बचतकर्ताको पैसा ३ वर्षभित्र फिर्ता गर्ने बताएका हुन् ।
तर, बचतकर्ताको सबै पैसा ३ वर्षभित्र फिर्ता गर्न आफू, श्रीमती र छोरीहरुमाथि लगाइएको ठगी मुद्दा र सम्पत्ति शुद्धिकरणको मुद्दा सरकारले फिर्ता लिनुपर्ने तामाङले बताएका छन् ।
सरकारले आफू र आफ्नो परिवारका सदस्यमाथि लगाइएको मुद्दा सरकारले फिर्ता लिने हो भने सहकारीको नाममा रहेको सम्पत्ति बेचेर, सहकारीबाट ऋण लिएका ऋणीहरुबाट ऋण असुली गरेर बचतकर्ताको पैसा फिर्ता गर्न सकिने उनको भनाई छ ।
सहकारीका सञ्चालकलाई थुनेर मात्रै समस्याको समाधान नहुने भन्दै उनले सहकारीका बचतकर्ताको पैसा फिर्ता गर्नका लागि आफूलाई कारागार मुक्त गर्नुपर्ने र आफू र आफ्नो परिवारमाथि सरकारले दायर गरेको ठगी तथा संगठित अपराध मुद्दा (काठमाडौँ जिल्ला अदालतमा विचाराधीन) र सम्पत्ति शुद्धिकरणको मुद्दा सरकारले फिर्ता लिनुपर्ने तर्क संसदीय समितिसँगको बयानमा भनेका छन् ।
उनले सिभिल सहकारीमा बचतकर्ताको निक्षेप दायित्व ६ अर्ब रहेको र सहकारीको नाममा रहेको सम्पत्ति करिब १९ अर्ब रुपैयाँ बराबरको रहेको भन्दै आफू जेलमुक्त भए र सबै मुद्दा फिर्ता लिइएको खण्डमा बचतकर्ताको सबै निक्षेप सहजै फिर्ता गर्न सकिने पनि बताएका छन् ।
