काठमाडौँ । वाणिज्य बैंकहरुले लिने कर्जाको ब्याजदर घटेको छ । नेपाल राष्ट्र बैंकले सार्वजनिक गरेको तथ्यांक अनुसार वाणिज्य बैंकहरुले लिने कर्जाको ब्याजदर औसत ०.२५ प्रतिशतले घटेको हो ।
कर्जाको ब्याजदर ०.२५ प्रतिशतले घटेर औसत ९.६८ प्रतिशतमा झरेको छ । अघिल्लो आर्थिक वर्षको सोहि अवधिमा वाणिज्य बैंकहरुले लिने कर्जाको औसत ब्याजदर १२.२४ प्रतिशत थियो । हाल कायम भएको ब्याजदर तीन वर्षयताकै सस्तो हो । अर्थतन्त्रमा शिथिलता आएसँगै कर्जाको माग घटेपछि ब्याजदर पनि घट्दो क्रममा देखिएको छ ।
बैंकहरुले गत कात्तिक महिनादेखि लगातार निक्षेपको ब्याजदर घटाउँदै आएका छन् । निक्षेपको ब्याजदर घटेसँगै बैंकहरुको लागत घट्न गई आधारदर (बेस रेट) सस्तिँदा कर्जाको ब्याजदर पनि थप घटेको हो ।
बैंकहरूको औसत ब्याजदर ९.६८ प्रतिशतमा आएसँगै कतिपय कर्जाको ब्याजदर एकल अंकमा आएको छ । कृषि, वन र पेय पदार्थ उत्पादन, माछापालन, बिजुली, ग्यास र पानी, धातु उत्पादन, मेसिनरी, इलेक्ट्रोनिक उपकरण, थोक बिक्रेता र खुद्रा बिक्रेता तथा वित्त, बिमा र घर जग्गा लगायतका कर्जाको ब्याजदर एकल अंकमा झरेको छ ।
त्यस्तै, यातायात, सञ्चार र सार्वजनिक उपयोगिताका, होटल वा रेस्टुरेन्ट र अन्य सेवा क्षेत्रमा प्रवाह हुने कर्जाहरुको औसत ब्याजदर एकल अंकमा नरहे पनि गत वर्षको तुलनामा उल्लेखीय रुपमा घटेको छ ।
