काठमाडौँ । प्रवेशद्वार नजिकै नेपालको नक्सामा रहेको लिम्पियाधुरा र कालापानीको नक्सा नै गायब पारेर बिवाईडी नामक कम्पनीले मनपरी गरेपछि ‘राष्ट्रघात’को बात लागेको नाडा अटो शो अन्तत सकिएको छ । कमजोर व्यवस्थापन, र अवलोकनकर्ताको कम चासोका बीच अध्यक्ष करण चौधरीलाई असफल बनाउन नाडाभित्रकै एक गुट सक्रिय भएर लागेपछि शोलाई जवर्जस्त विवादमा मात्र तानिएन, त्यसको असर भविष्यमा थप देखिँदै जाने अनुमान गरिएको छ ।

चौधरीलाई असफल देखाउन चिठ्ठाका नाममा मुख्य प्रायोजकलाई दिईएको कमजोर स्थान, नेपालकै नक्सा पूरानो राखेर गरिएको विवाद, कमजोर व्यवस्थापन र बजारीकरणका देखिएको कम उल्लासले एकातर्फ नाडालाई ‘असफल’ बनाएको विश्लेषण गरिएको छ भने अर्कोतर्फ निरन्तरको झरीलेसमेत कम अवलोकनकर्ता आएपछि शो थप फ्लप बनेको विश्लेषण जानकारहरुको छ ।

नाडा अटो शोकै समयमा विद्युतीय गाडीमा देखिएको कमजोरीका कारण गाडी दुर्घटनामा पर्नु, इभिका समस्याहरु एक एक गरी बाहिर ल्याउन एक गुट नै सक्रिय रुपमा लाग्नु र इभिको मूल्य अर्को बर्ष ह्वात्तै घट्ने प्रक्षेपण स्वयम् नाडाभित्रकै अधिकारीहरुले संचारमाध्यमलाई ब्रिफिङ गर्नुले पनि नाडा थप असफल भएको हो ।

थुप्रै गाडी कम्पनीहरुले कालोबजारी गर्न खुलेआम छुट पाएको सो शो अर्थमन्त्री विष्णु पौडेलले गरेका थिए । प्रधानमन्त्रीले काभ्रेमा पुगेर हुन्डाईको हाइड्रोजन कार उद्घाटन गरेपछि नाडालाई यसपटक थप नैतिक संकट देखिएको थियो । बाहिर सयौं गाडी बुक भएको भनिएपनि गाडी अर्को बर्ष ह्वात्तै मूल्य घटेर आउने भएपछि सो गाडीका बुक भकाभक रद्ध गरिएका छन् । सेयर बेचेरै गाडी बुक गरेकाहरुले त झन् सेयरको भाउ घटेपछि बुकिङ रद्ध गरेर बजारमै प्रवेशको तयारी गरेका छन् ।

शोभरि चिनियाँ गाडीको प्रभुत्व बढी भएपछि धेरैले शोलाई चिनियाँ मालसामानको मेला भनेर उपनामसमेत दिईरहेका छन्।