काठमाडौँ । साताको कारोबारको पहिलो दिन आइतबार सेयर बजार मापक नेप्से परिसूचक घटेको छ । आज नेप्से परिसूचक २५ .४६ अंकले घटेर २७०१.९० बिन्दुमा पुगेको हो ।

नेप्सेमा कुल ३ सय २८ कम्पनीको २ करोड २२ लाख ६२ हजार ९ सय २४ कित्ता सेयर खरिद बिक्री हुँदा १० अर्बमाथिको कारोबार भएको छ ।

आइतबार सबैभन्दा धेरै कारोबार सीइडीबी हाइड्रोपावरको भएको छ । यस कम्पनीको ४२ करोड १९ लाख २५ हजार २ सय १० रुपैयाँ ८० पैसा बराबरको सेयर कारोबार भएको छ ।

त्यस्तै, आजको बजारमा महुली लघुवित्त वित्तीय संस्था लिमिटेडका लगानीकर्ताले सबैभन्दा धेरै नाफा कमाएका छन् । यस कम्पनीको सेयर मूल्यमा पोजेटिभ सर्किट लागेको हो । आइतबार महुली लघुवित्तसहित ३ कम्पनीको सेयर मूल्यमा पोजेटिभ सर्किट लागेको छ ।

यता, थ्री स्टार लघुवित्त वित्तीय संस्था लिमिटेडका लगानीकर्ताले सबैभन्दा धेरै गुमाएका छन् । यस कम्पनीको सेयर मूल्यमा नेगेटिभ सर्किट लागेको हो ।