काठमाडौँ । मकवानपुरको राक्सिराङ गाउँपालिकाले बसाइँ सरेर आउनेलाई घर उपहार दिने भएको छ । घरबार छोडेर शहर बसाइँ सर्नेहरु बढेपछि गाउँपालिकाले अन्यत्रबाट बसाइँ सरेर गाउँपालिकाभित्र आउनेलाई आगामी वर्षदेखि घर उपहार दिने भएको हो ।
यसका लागि गाउँपालिकाले बजेटमै ‘सुन्दर समाज हाम्रो सार, बसाइँ सरी आउनेलाई घर उपहार’ कार्यक्रमको व्यवस्था गरेको छ ।
यसरी उपहार दिइने घर कस्तो प्रकारको हुने ? र कति लागतको हुने ? भन्ने कुरा गाउँपालिकाले बनाउने कार्यविधिमा निर्भर हुने गाउँपालिकाले जनाएको छ ।
पछिल्लो समय दुर्गम भेगबाट बसाइँ सरेर सुगम क्षेत्र जानेहरु बढेपछि उक्त प्रवृत्तिलाई निरुत्साहित गर्नेगरी गाउँपालिकाले नीति तथा कार्यक्रममै उक्त योजना ल्याएको गाउँपालिकाका अध्यक्ष राजकुमार मल्लले बताएका छन् ।
