काठमाडौँ । सर्वोच्च अदालतले नेकपा एमालेलाई भाटभटेनी सुपरमार्केटका साहु मीनबहादुर गुरुङले दान दिएको जग्गा हक हस्तान्तरण नगर्न आदेश दिएको छ । न्यायाधीश सुनिलकुमार पोखरेलको इजलासले उक्त अल्पकालीन अन्तरिम आदेश दिएको हो ।
उक्त आदेशसँगै सर्वोच्चले निवेदक ज्ञान बस्नेत र विपक्षी नेकपा एमाले र व्यवसायी मीनबहादुर गुरुङलाई छलफलमा बोलाएको छ ।
जग्गा दानको विवादमा दुवै पक्षबीच छलफल नहुँदासम्म एमालेको पार्टी कार्यालय निर्माणका लागि भन्दै गुरुङ दान दिएको जग्गाको हक हस्तान्तरण नगर्न अल्पकालीन अन्तरिम आदेश जारी गरिएको हो ।
त्यस्तै, अदालतले जग्गा लिने र दिने दुवै पक्ष (नेकपा एमाले र व्यवसायी मीनबहादुर गुरुङ)लाई त्यसको कारण देखाउन मागसमेत गरेको छ । गुरुङले एमालेलाई कलंकीमा पार्टी कार्यालय निर्माणका लागि जग्गा दान गर्नुका साथै दशैँको फूलपातीको दिन पार्टी कार्यालयको शिलान्याससमेत गरेका थिए ।
