काठमाडौँ । नेपाल बीमा प्राधिकरणका अध्यक्ष सूर्य प्रसाद सिलवालविरुद्ध भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले सिलवालविरुद्ध भ्रष्टाचार मुद्दा दायर गरेको हो ।
उनीविरुद्ध नागरिकताको विवरण हेरफेर गरेर व्यक्तिगत लाभ लिएको आरोप लागेको छ ।
अख्तियारका एक उच्च अधिकारीका अनुसार सिलवालले नागरिकताको विवरण पटकपटक हेरफेर गरेर व्यक्तिगत लाभ लिएको देखिएको छ । त्यति मात्र होइन, सिलवालमाथि राहदानी केरमेट र जालझेल गरेकोसमेत आरोप छ ।
प्राधिकरणको अध्यक्ष ६५ वर्षको उमेरको हदबाट अनिवार्य अवकाश हुनुपर्ने प्रावधान भएपनि सिलवालले ६६ वर्ष पुग्दा पनि पदमै बसेर ९ महिनादेखि राष्ट्रसेवक पदको दुरुपयोग गरी व्यक्तिगत लाभ लिएको भन्दै उजुरी परेको थियो ।
सोही उजुरीमाथि अनुसन्धान गर्दा सिलवालले जिल्ला प्रशासन कार्यालय पर्साबाट २०३२ फागुन २४ गते नागरिकता लिएको खुलेको छ । त्यसपछि उनले २०६६ सालमा नागरिकताको प्रतिलिपि लिएको देखिन्छ । जहाँ सिलवालको जन्ममिति २०१६ कार्तिक २२ गते उल्लेख छ । तर, निजामती सेवा प्रवेश गर्दा उनले आफ्नो जन्ममिति २०१५ साउन १५ गते उल्लेख गरेका थिए । सोही मितिलाई आधार मानेर सिलवालले निजामति सेवाबाट २०७३ साउन १५ गते अवकाश लिएका थिए ।
पछि बीमा प्राधिकरणको अध्यक्ष भएपछि सिलवालले आफ्नो जन्ममिति २०१८ कार्तिक २४ भएको दाबी गरे । सोही विवरण पेश गरेर उनले कुटनीतिक राहदानी, विशेष राहदानी लिएको र व्यक्तिगत लाभ लिएको अख्तियारले जनाएको छ ।
