काठमाडौँ । भाटभटेनी सुपरमार्केट फेरि कारवाहीमा परेको छ । ललितपुरको चापागाउँ दोबाटोस्थित भाटभटेनी सुपरमार्केट कारवाहीमा परेको हो ।
जिल्ला प्रशासन कार्यालय ललितपुरका सहायक प्रमुख जिल्ला अधिकारी गीता घिमिरेको नेतृत्वमा भएको संयुक्त जिल्ला बजार अनुगमनका क्रममा ‘लेबल’ नराखी खाद्य बस्तु बेचेको पाइएपछि भाटभेटेनी सुपरमार्केटलाई कारवाही गरिएको हो ।
भाटभेटनीले बेचिरहेको इम्लीको अचारमा म्याद नलेखिएको पाकेट भेटिएको अनुगमनमा सहभागी एक अधिकारीले बताएका छन् । ती अधिकारीका अनुसार उक्त अचारका प्याकेटमध्ये एउटा परीक्षणका लागि पठाइएको छ भने बाँकी प्याकेट जफत गरिएको छ ।
भाटभेटेनी सुपरमार्केटले लेबल नराखी खाद्यवस्तु बेचेको पाइएपछि भाटभटेनीलाई कारवाहीस्वरुप १० हजार रुपैयाँ जरिवाना तिराइएको छ । त्यस्तै, अनुगमनका क्रममा उक्त टोलीले मकवानपुर फाष्टफुड र ए टु जेड स्टोरलाई कमजोरी सुधार्न सचेत गराएको छ ।
यसअघि ढुसी परेको नरिवल बेचिरहेको पाइएपछि भाटभटेनीको काठमाडौँस्थित त्रिपुरेश्वर आउटलेटलाई २ लाख रुपैयाँ जरिवाना तिराइएको थियो ।
