काठमाडौँ । शनिबार राती करिब २ बजेको समयमा एनएमबी बैंकको दाङस्थित तुल्सीपुर शाखामा चोरीको प्रयास भएको थियो । जुन घटनामा संलग्न २७ वर्षीय सन्तोष चौधरीलाई प्रहरीले पक्राउ गरेको छ ।
पक्राउ परेपछि चौधरीमाथि अनुसन्धान गर्दै जाँदा चौधरीको सोही बैंकमा खाता रहेको खुलेको छ । तुल्सीपुर-१८ दुधरासका चौधरीले बैंकमा आफ्नो खाता हुनुका साथै कारोबार गर्ने गरेको पनि प्रहरीसमक्ष बयान दिएका छन् ।
बेलाबेलामा बैंकमा सानो रकम जम्मा गर्न र झिक्न गइरहने चौधरी बैंक चोर्न पाए एकैपटकमा धेरै पैसा झिक्न पाइन्छ भन्ने मनसायका साथ मध्यरातमा बैंकभित्र प्रवेश गरेको अनुसन्धानबाट खुलेको छ । पक्राउ परेका चौधरीले दिउँसो मात्रै गार्ड हुन्छन्, राति कोही हुँदैन भन्ने थाहा पाएर मध्यरातमा चोरीको प्रयास गरेको प्रहरीसमक्ष बयान दिएका छन् ।
त्यस्तै, उनले उपचारका लागि पैसा नभएपछि बैंक चोरीको प्रयास गरेको पनि प्रहरीसमक्ष बयान दिएका छन् । ‘मेरो खुट्टामा रड छ । उपचार गर्न पैसा छैन । तर बैंक चोर्न पाए उपचार हुने पैसा जुटाउन सकिन्छ भन्ने लागेर बैंकभित्र चोरी गर्न प्रवेश गरेको हूँ ।’, चौधरीको भनाइलाई उदृत गर्दै एक प्रहरी अधिकारीले भने । चौधरीमाथि थप अनुसन्धान भइरहेको प्रहरीले जनाएको छ ।
चौधरीको साथबाट प्रहरीले हतौडा, छिनो, पिलास, ह्वाक्सा बिलेट लगायतका सामग्री पनि बरामद गरेको थियो ।
