काठमाडौँ । नेपाल राष्ट्र बैंकले ७ विकास बैंक र ८ फाइनान्स कम्पनीका प्रमुख कार्यकारी अधिकृत (सिइओ)लाई कारवाही गरेको छ । सहुलियतपूर्ण कर्जाको दुरुपयोग गरेको पाइएपछि राष्ट्र बैंकले विकास बैंकतर्फ लुम्बिनी विकास बैंक, महालक्ष्मी विकास बैंक, कामना सेवा विकास बैंक, मुक्तिनाथ विकास बैंक, सालपा विकास बैंक, गरिमा विकास बैंक र सप्तकोशी डेभलपमेन्ट बैंकका सिइओलाई कारवाही गरेको हो ।
राष्ट्र बैंकको कारवाहीमा परेका बैंकहरुले पुनर्कर्जा, व्यावसायिक निरन्तरता कर्जा र सहुलियतपूर्ण कर्जाको सदुपयोगिताको अध्ययन गर्न नियुक्त गरेको परामर्शदाताले पेश गरेको प्रतिवेदनमा बैंकबाट प्रवाह भएको कर्जामध्ये ठूलो कर्जाको दुरुपयोग भएको वा दुरुपयोगको आशंका भएको भन्दै कैफियत देखाएको थियो ।
सो प्रतिवेदनमा उक्त कैफियत उपर सम्बन्धित संस्थाले आन्तरिक लेखा परीक्षकबाट तयार गरेको प्रतिवेदनमा केही सहुलियतपूर्ण कर्जा सदुपयोग नभएबाट सहुलियतपूर्ण कर्जासम्बन्धी मार्गदर्शन र निर्देशन उल्लङ्घन भएको उल्लेख गरिएको थियो । सो लगत्तै नेपाल राष्ट्र बैंकले ७ विकास बैंकका सिइओलाई कारवाहीस्वरुप पहिलो पटकका लागि सचेत गराएको छ ।
त्यस्तै, राष्ट्र बैंकले फाइनान्सतर्फ समृद्धि फाइनान्स, पोखरा फाइनान्स, प्रोग्रेसिभ फाइनान्स, आई.सि.एफ.सि फाइनान्स, जानकी फाइनान्स, सेन्ट्रल फाइनान्स, रिलायन्स फाइनान्स र गुडविल फाइनान्सका सिइओलाई कारवाही गरेको छ । यी कम्पनीहरुलाई राष्ट्र बैंकले सहुलियतपूर्ण कर्जा दुरुपयोग गरेको पाइएपछि कारवाही गरेको हो ।
तर, सेन्ट्रल फाइनान्सलाई भने राष्ट्र बैंकले २०८१ मंसिर ८ गतेदेखि २०८१ पुष १३ सम्मको अवधिमा नियामकीय व्यवस्था अनुसार कायम गर्नुपर्ने अनिवार्य मौज्दात रकम कायम नगरेको भन्दै ९ हजार एक सय ६ रुपैयाँ नगद जरिवाना गरेको छ । त्यस्तै, कालोसूचीमा रहेका ऋणीलाई समेत व्यक्तिगत अधिविकर्ष कर्जा प्रवाह गरेको पाइएपछि गरिमा विकास बैंकलाई कारवाही गरिएको छ ।
