काठमाडौँ । नेपालमा बियर खानेहरु बढेका छन् । बियर खानेहरु बढेपछि चालु आर्थिक वर्ष २०८१/८२ को ६ महिनामा नेपालमा बियरको खपत ३८.३१ प्रतिशतले बढेको छ ।
बियरको खपत बढेसँगै सरकारले बियरबाट मात्रै ६ महिनामा १७ अर्ब २५ करोड रुपैयाँ राजस्व संकलन गरेको छ ।
गत आर्थिक वर्षको तुलनामा चालु आर्थिक वर्षमा बियर, मदिरा र सुर्तीजन्य पदार्थको उत्पादन र खपत दुवै बढेको महालेखा नियन्त्रक कार्यालयले जनाएको छ ।
गत आर्थिक वर्षको ५ महिनामा १२ अर्ब ४७ करोड रुपैयाँ अन्तःशुल्क संकलन भएकोमा चालु आर्थिक वर्षको सोही अवधिमा मदिरा उत्पादनबाट मात्रै १५ अर्ब २६ करोड रुपैयाँ अन्तःशुल्क संकलन भएको छ । त्यस्तै, सुर्तिजन्य पदार्थबाट चालु आर्थिक वर्षको ६ महिनामा १३ अर्ब ७९ करोड रुपैयाँ राजस्व संकलन भएको छ । जबकी गत आर्थिक वर्षमा सुर्तीजन्य पदार्थबाट १२ अर्ब ९२ करोड राजस्व उठेको थियो ।
