काठमाडौँ । नेपाल राष्ट्र बैंकको गभर्नर नियुक्तिका लागि तीन सदस्यीय समिति गठन भएको छ । फागुन २६ गते बसेको मन्त्रिपरिषद्को बैठकले अर्थमन्त्री विष्णु पौडेलको संयोजकत्वमा तीन सदस्यीय सिफारिस समिति गठन गरेको हो ।
अर्थमन्त्री संयोजक रहेको उक्त समितिमा डा. विश्वनाथ पौडेल र पूर्वगभर्नर विजयनाथ भट्टराई सदस्य छन् । राष्ट्र बैंकका हालका गभर्नर महाप्रसाद अधिकारीको कार्यकाल चैत २५ गते सकिँदैछ । गभर्नरको कार्यकाल सकिन थालेपछी सरकारले नयाँ गभर्नर नियुक्तिका लागि सिफारिस समिति गठन गरेको हो ।
उक्त समितिले गभर्नरका लागि आवेदन दिनेहरुबाट एकजना डेपुटी गभर्नरसहित तीन जनाको नाम सिफारिस गर्नेछ । समितिले सिफारिस गरेकामध्येबाट सरकारले एकजनालाई नेपाल राष्ट्र बैंकको गभर्नर नियुक्त गर्नेछ ।
यसो त सरकारले सिफारिस समिति गठन गर्नुपूर्व नै गभर्नरका लागि लबिङ सुरु भइसकेको थियो । यद्यपि प्रमुख निर्वाचन आयुक्त एमालेले लिएर यसपटक गभर्नर काँग्रेसको भागमा पर्ने देखिएको राजनीतिक वृत्तमा चर्चा छ । राष्ट्र बैंकको गभर्नरका लागि राष्ट्र बैंककै डेपुटी गभर्नर निलम ढुङ्गाना, बमबहादुर मिश्र, लगानी बोर्डका पूर्व सिइओ सुशील भट्ट, पूर्व अर्थसचिव रामेश्वर खनाल तथा पूर्व बैंकर र केही बैंकका सिइओ पनि दौडमा छन् ।
