काठमाडौँ । नेपाल राष्ट्र बैंकका गभर्नर महाप्रसाद अधिकारीले मध्यरातमा प्रधानमन्त्रीसँग भेट गरेको खुलेको छ । बुधबार राती गभर्नर अधिकारीले प्रधानमन्त्री केपी शर्मा ओलीसँग गोप्य भेट गरेको खुलेको हो ।
प्रधानमन्त्रीको निजी निवास बालुवाटारमा भएको उक्त गोप्य भेटमा अर्थमन्त्री विष्णु पौडेल पनि सहभागी भएको बताइएको छ ।
बुधबार राती ८ बजे बालुवाटार पुगेका गभर्नर अधिकारी करिब ४ घण्टा लामो भेटपछि १२ बजे प्रधानमन्त्री निवासबाट बाहिरिएका थिए । नयाँ गभर्नरका आकांक्षीहरुको दौडधुप चलिरहेका बेला गभर्नर, प्रधानमन्त्री र अर्थमन्त्रीबीच भएको उक्त गोप्य भेटवार्तालाई अर्थपूर्ण रुपमा हेरिएको छ ।
भेटमा गभर्नर अधिकारीले राष्ट्र बैंकको १८औँ गभर्नरमा आफैँ दोहोरिन चाहेको विषय ब्रिफिङ गरेको हुनसक्ने प्रधानमन्त्री निकट स्रोतले बताएको छ ।
अर्कोतर्फ नयाँ गभर्नरको खोजी गरिरहेको सरकारलाई सहजीकरण गर्ने विषयमा छलफल भएको हुनसक्ने पनि आँकलन गरिएको छ । प्रहरी नेतृत्व काँग्रेसले लिएपछि गभर्नर एमालेको भागमा परेपछि आफैँ दोहोरिने लबिङमा अधिकारी लागेको विषयलाई पनि नकार्न नसकिने जानकारहरु बताउँछन् । यद्यपि गभर्नर अधिकारीको कार्यकालबाट खासै सन्तुष्ट नभएका प्रधानमन्त्री ओली भने एमालेबाट अन्य कसैलाई गभर्नर बनाउने कि ! भन्ने मनसायमा रहेको प्रधानमन्त्री निकट स्रोतले दाबी गरेको छ ।
