काठमाडौँ । एनआईसी एशिया बैंकका ब्राण्ड एण्ड कम्युनिकेसन प्रमुख सरोज भट्टराई कारवाहीमा परेका छन् ।
मिडियाबाट अनुचित लाभ लिएको भन्दै बैंकले उनलाई कारवाही गरेको हो । कारवाहीस्वरुप बैकले भट्टराईलाई जिम्मेवारीबाट हटाएको छ । भट्टराईलाई जिम्मेवारीबाट हटाइएको बैंककै एक अधिकारीले पुष्टि गरेका छन् ।
‘उहाँविरुद्ध मिडिया हाउसहरुबाट अनुचित लाभ लिएकोदेखि अन्य गुनासाहरु आइरहेका थिए । त्यसलाई बैंकले गम्भीर रुपमा हेरिरहेको थियो ।’, अर्थ सरोकारसँग कुराकानी गर्दै बैंकका ती अधिकारीले भने, ‘पछि गुनासो झन्झन् बढ्न थालेपछी उहाँलाई जिम्मेवारीबाट हटाइएको छ ।’
ती अधिकारीका अनुसार बैंकले उनलाई साबिकको जिम्मेवारी (ब्राण्ड एण्ड कम्युनिकेसन प्रमुख) बाट हटाएर अर्को विभागमा सरुवा गरिदिएको छ । उक्त विषयमा बुझ्न हामीले स्वयम् भट्टराईलाई नै सम्पर्क गरेका थियौँ । तर, उनी हाम्रो सम्पर्कमा आएनन् ।
