काठमाडौँ । प्रधानमन्त्री केपी शर्मा ओलीले थाइल्याण्डमा रहेका उद्योगी व्यवसायीहरुसँग छलफल गरेका छन् । बिहीवार बिहान प्रधानमन्त्री ओलीले नेपालमा लगानीको लागि आह्वान गर्दै व्यवसायीहरुसँग छलफल गरेका हुन् ।
छलफलका क्रममा प्रधानमन्त्री ओलीले नेपाल-थाइल्याण्डबीच दौँत्य सम्बन्ध कायम भएको लामो समय भइसकेको र दुई देशबीचको सम्बन्ध सौहार्दपूर्ण रहेको बताएका छन् । नेपाल र थाइल्याण्ड कहिल्यै उपनिवेशमा बस्नु नपरेका देश हुन् । समान गरिबीबाट उठ्न खोजेको यी दुई देशमध्ये नेपाल धेरै नै अघि बढिसकेको छ । तर, पछिल्लो दशकमा थाइल्याण्डले विकास गरेको प्रविधि, हासिल गरेको समृद्धि र गरिबी निवारणमा अख्तियार गरेका नीतिहरुका कारण अहिले थाइल्याण्ड समृद्ध मुलुकहरुको सूचीमा गनिन्छ ।
थाइल्याण्डले सिकेका ज्ञान, सीप र हासिल गरेको नवीनतम प्रविधिहरु नेपालमा भित्र्याउन सके र थाइल्याण्डका लगानीकर्ताहरुले नेपालमा लगानी गर्नसके नेपालले पनि छिटै समृद्धि हासिल गर्ने ओलीले बताएका छन् ।
उनले अहिले नेपालमा लगानीको वातावरण बनेको र लगानीको सुरक्षाका लागि सरकार हदैसम्म लचिलो भएको भन्दै उनले विदेशी लगानी भित्र्याउनकै लागि कानून समेत संशोधन भएको जानकारी गराएका छन् ।
त्यस्तै, कार्यक्रममा थाइल्याण्डका व्यवसायीहरुले नेपालको शिक्षा, स्वास्थ्य, प्रविधिका विषयमा लगानी गर्न इच्छुक रहेको कुरा व्यक्त गरेको उद्योग वाणिज्य महासंघका अध्यक्ष चन्द्रप्रसाद ढकालले जानकारी दिएका छन् । नेपाल-थाइल्याण्डको सम्बन्ध पर्यटनमा तुलनात्मक रुपमा राम्रो छ । थाइल्याण्ड बौद्धमार्गी देश भएकाले पनि बहुसंख्यक बौद्धमार्गीहरु बुद्ध जन्मिएको देश नेपालको लुम्बिनी भ्रमणमा आउने गर्दछन् । त्यसैले पनि पर्यटनबाट लगानी भित्र्याउन सकिने प्रचुर सम्भावना नेपालसँग छ । थाइल्याण्डका व्यवसायीहरुले नेपालमा लगानीका लागि कृषि र प्रविधिका विषयमा बढी जोड दिइरहेका छन् । नेपालमा रहेका उद्योगी छाता संगठनहरुको निरन्तरको प्रयास र पछिल्लो समय सरकारले लगानीका लागि कानून संशोधन गरी बनाएको अनुकुल वातावरणको प्रभावले धेरै लगानी कर्ताहरु आकर्षित हुने सरकारको विश्वास रहेको छ ।
