काठमाडौँ । कामना सेवा विकास बैंकले चालु आर्थिक वर्षको तेस्रो त्रैमाससम्मको अपरिस्कृत वित्तीय विवरण सार्वजनिक गरेको छ । बैंकले सार्वजनिक गरेको विवरणअनुसार चैत मसान्तसम्म बैंकले कुल ४९ करोड ३२ लाख रुपैयाँ खुद नाफा कमाएको छ । यो गत आर्थिक वर्षको तुलनामा ४८.८३ प्रतिशतले धेरै हो । गत आर्थिक वर्षको सोही अवधिमा बैंकले ३३ करोड १४ लाख रुपैयाँ खुद नाफा कमाएको थियो ।
यस अवधिमा बैंकको वितरणयोग्य मुनाफा ४९ करोड ५८ लाख रुपैयाँ रहेको छ । चालु आर्थिक वर्षको चैत मसान्तसम्म बैंकले १८.९८ प्रतिशत लाभांश क्षमता बनाएको छ ।
समीक्षा अवधिमा बैंकको सञ्चालन मुनाफा ३२.४४ प्रतिशतले बढेर ७१ करोड ६१ रुपैयाँ पुगेको छ भने बैंकले १ अर्ब ६६ करोड ४२ लाख रुपैयाँ ब्याज आम्दानी गरेको छ । जुन गत आर्थिक वर्षको तुलनामा १४.१४ प्रतिशत धेरै हो ।
नाफासँगै समीक्षा अवधिमा बैंकको प्रतिसेयर आम्दानी (ईपीएस) पनि बढेको छ । यस अवधिमा बैंकको ईपीएस १३ रुपैयाँ ४७ पैसाबाट बढेर १८ रुपैयाँ ७३ पैसा पुगेको छ । बैंकको प्रतिसेयर नेटवर्थ १६३ रुपैयाँ २२ पैसा रहेको छ । समीक्षा अवधिसम्म बैंकले ६१ अर्ब ८८ करोड ७३ लाख रुपैयाँ निक्षेप संकलन गरी ४९ अर्ब ४६ करोड ७५ लाख रुपैयाँ कर्जा लगानी गरेको छ ।
बैंकको कर्जा–निक्षेप अनुपात ८६.०७ प्रतिशत रहेको छ । सोही अवधिसम्ममा बैंकको कुल सम्पत्ति ७० अर्ब २७ करोड रुपैयाँ पुगेको छ । जुन अघिल्लो वर्ष सोही अवधिमा ६७ अर्ब १९ करोड रुपैयाँ रहेको थियो । यसले बैंकको व्यापार विस्तार बढेको देखिन्छ ।
