काठमाडौँ । राजश्व सचिव दिनेश घिमिरेले बैंकर र व्यवसायी छुट्याउने विषयमा अर्थ मन्त्रालयले थप गृहकार्य गरिरहेको बताएका छन् । अर्थ समितिमा भएको बैंक तथा वित्तीय संस्था सम्बन्धी विधेयकमाथिको छलफलमा बोल्दै उनले यस्तो बताएका हुन् ।
बैंकर र व्यवसायी छुट्याउनेबारे कुलिङ पिरियडको सम्बन्धमा आवश्यक नीतिगत व्यवस्था गर्नका लागि थप गृहकार्य भइरहेको घिमिरेले बताएका छन् । घिमिरेका अनुसार दफाबारमा छलफल गर्दा मन्त्रालयले आवश्यक प्रस्ताव ल्याउनेछ । यसका लागि अर्थले तयारी थालिसकेको छ ।
त्यस्तै, पुँजीबजार, लामोसमय कर्जा लिएको हाइड्रोपावरको क्षेत्र जस्तालाई तत्काल कसरी व्यवस्थापन गर्ने ?, विधेयकले कसरी सम्बोधन गर्नेबारे अर्थमन्त्रालयले गृहकार्य थालेको पनि उनले बताएका छन् । उनका अनुसार कतिपय कानून सैद्धान्तिक रुपमा राम्रो हुने र व्यवहारिक रुपमा कठिनाइ हुने गरेको बताउँदै उनले त्यसमा ख्याल गरिने बताएका छन् ।
त्यस्तै, घिमिरेले बैकिङ पहुँचको विस्तार, प्रभावकारी रुपमा सेवा र अधिक प्रतिफलका विषयमा पनि सैद्धान्तिक रुपले बाफियाको संशोधनमा विषयहरु आउनु सकारात्मक भएको बताएका छन् । उनले समग्र अर्थतन्त्रलाई चलायमान गराउन यो विधेयक महत्वपूर्ण रहने पनि बताएका छन् ।
