काठमाडौँ । नेपाल स्टक एक्सचेन्ज (नेप्से)ले अपर स्याङ्गे हाइड्रोपावरलाई कारबाही गरेको छ । वार्षिक साधारण सभा सम्बन्धी सञ्चालक समितिको निर्णय ढिलो गरी पठाएको भन्दै नेप्सेले स्याङ्गे हाइड्रोपावरलाई कारवाही गरेको हो ।
कारवाहीस्वरुप नेप्सेले कम्पनीको सेयर कारोबार तीन दिन रोक्का गरेको छ । त्यस्तै, सोही तीन कार्यदिनभित्र चित्त बुझ्दो जवाफ पठाउन पनि नेप्सेले कम्पनीलाई निर्देशन दिएको छ ।
कम्पनीको सञ्चालक समितिको भदौ ११ गते बसेको बैठकले १ सय प्रतिशत हकप्रद सेयर जारी गर्ने एजेन्डासहित असोज ९ गते नवौँ वार्षिक साधारण सभा गर्ने निर्णय गरेको थियो । तर, सो जानकारी कम्पनीले भदौ १६ गते मात्र नेप्सेमा पठाएको थियो ।
धितोपत्र सूचीकरण विनियमावली, २०७५ अनुसार धितोपत्र मूल्यमा प्रभाव पार्ने सूचना, जानकारी तथा निर्णय सोही दिन वा भोलिपल्ट कारोबार समयअघि नै पेश गर्नुपर्ने व्यवस्था छ । तर, कम्पनीले नियमको उल्लंघन गर्दै पाँच दिनपछि मात्र नेप्सेमा जानकारी पठाएपछि कारवाही गरिएको नेप्सेले जनाएको छ ।
