काठमाडौँ । राष्ट्रिय बाणिज्य बैंककै कमजोरी कारण बैंकबाट मोटो रकम प्रदर्शनकारीले चोरेर भागेको खुलासा भएको छ । सामान्यतया भल्टमा सुरक्षितसँग राख्नुपर्ने रकम निकै असुरक्षित तरिकाले राख्दा पैसा चोर्नेहरुलाई सजिलो बनेको पाइएको हो ।

अन्य बैंकमा पनि प्रदर्शनकारीले आगो लगाएको भए पनि ती बैंकका भल्ट भने सुरक्षित छन् । आगो लागेका हिमालयन बैंक लगायतका बैंकहरुको भल्टको रकम सुरक्षित रहँदा राष्ट्रिय बाणिज्य बैंकको रकमभने बैंककै कमजोरीका कारण चोरी भएको पाइएको हो ।

बैंकको कमजोरीकै कारण ग्राहकले बैंकमा राखेको सुन पनि चोरी भएको पाइएको छ । सामान्यतया सुन लकरमै राख्ने गरिन्छ । तर राष्ट्रिय बाणिज्य बैंकले भने सो सुन अपनाउनुपर्ने सुरक्षाविना राखिएको पाइएको हो ।

पैसा असुरक्षित राख्ने काममा बैंक मेनेजरले लापरवाही गरेको भन्दै बैंकले ब्रान्च मेनेजरलाई आन्तरिक कारवाहीको तयारीसमेत गरेको बुझिएको छ ।

‘पैसा भल्टमा राख्नुपर्थ्यो । अरु कुरा जले पनि पैसा जल्दैनथियो ।’ राष्ट्रिय बाणिज्य बैंकका एक उच्च अधिकारीले अर्थ सरोकारसँग भने, ‘तर पैसा भल्टमा सुरक्षित नाराखेकै कारण चोरी भएको बुझ्न गाह्रो छैन । यो विषयमा बैंक नियमित खोल्नेबित्तिकै मेनेजरलाई कारवाही हुन्छ ।’