काठमाडौँ । लगातारको भारी वर्षापछि आइतबार काठमाडौँको मौसम खुलेको छ । शुक्रबार रातिदेखि परेको निरन्तर झरी रोकिएपछि आइतबार काठमाडौँ उपत्यकाको मौसम खुलेको हो ।
योसँगै काठमाडौँ लगायत आसपासका ‘रेड अलर्ट’मा परेका जिल्लाहरु पनि ‘रेड अलर्ट’बाट हटेका छन् । हाल काठमाडौँसहित बागमती प्रदेश, मधेश प्रदेश, लुम्बिनी प्रदेश, कर्णाली र सुदूरपश्चिम प्रदेशमा जोखिम कम हुँदै गएको छ ।
आज दिनभर कोशी प्रदेशमा भने जोखिम कायमै रहनेछ । इलाम, झापा, सुनसरी ‘रेड अलर्ट’मा परेका छन् । यद्यपि यी जिल्ला पनि सोमबार बिहानसम्म ‘रेड अलर्ट’बाट हट्ने पूर्वानुमान गरिएको छ ।
जोखिम रहेका क्षेत्रमा सरकारले सम्बन्धित निकायलाई उद्दार तथा राहतका लागि तैनाथ रहन निर्देशन दिएको छ भने अन्य प्रदेश तथा जिल्लाहरुमा अवस्थामा सामान्य बन्दै गएको छ ।
जोखिमको पूर्वानुमान हुनासाथ अन्तरिम सरकारले देखाएको तदारुकताको चौतर्फी प्रशंसा भइरहेको छ । हाल नागरिकहरुले अहिलेको सरकारले देखाएको तदारुकताकै कारण विगतमा जस्तो ठूलो क्षति ब्यहोर्नु नपरेको भन्दै सरकारलाई धन्यवाद दिइरहेका छन् ।
