काठमाडौँ । बिजुलीको बक्यौता विवादमा कुलमानले अडान नछोडेपछि अन्ततः उद्योगीहरु पहिलो किस्ता तिर्न तयार भएका छन् । सोमबार प्रधानमन्त्री, मन्त्री तथा उद्योगीहरुबीच भएको वार्तामा उर्जामन्त्री कुलमान आफ्नो अडानबाट पछि नहटेपछि उद्योगीहरु बक्यौताबापतको पहिलो किस्ता तिर्न तयार भएका हुन् ।
यसो त उद्योगीहरुले सुरुमा धरौटीको रुपमा पहिलो किस्ता बराबरको रकम प्राधिकरणमा बुझाउने र उद्योगहरुमा काटिएको लाइन जोड्नुपर्ने प्रस्ताव गरेका थिए ।
तर, उद्योगीहरुको प्रस्तावमा कुलमानले असन्तुष्टि जनाएका थिए । कुलमान आफ्नो अडानबाट पछि हट्ने स्थिति नदेखेपछि अन्ततः उद्योगीहरुले बक्यौताबापतको पहिलो किस्ता तिर्न सहमत भएको प्रधानमन्त्री कार्यालयले जनाएको छ ।
योसँगै अब उद्योगीहरुले प्राधिकरणमा धरौटी नभएर पहिलो किस्ता तिर्नेछन् । पहिलो किस्ताबापतको रकम उद्योगीहरुले तिरेपछि प्राधिकरणले उद्योगहरुमा लाइन जोड्नेछ ।
यद्यपि उद्योगीहरुले बुझाउने रकम धरौटी हो वा पहिलो किस्ता भन्ने विषय पछि सम्बन्धित निकायले व्याख्या गर्ने सहमति समेत भएको प्रधानमन्त्री कार्यालयले जनाएको छ । तर, उद्योगीहरु भने अहिले पहिलो किस्ता तिर्ने, उद्योगमा लाइन जोड्ने र अर्को सरकार आएपछि निहुँ खोजेर अहिले तिरेको पहिलो किस्ताको रकम समायोजन गर्ने रणनीतिमा देखिन्छन् ।
