काठमाडौँ । आठ बीमा कम्पनी कारवाहीमा परेका छन् । बीमा ऐन २०७९ का प्रावधानहरू पालना नगरेको भन्दै नेपाल बीमा प्राधिकरणले आठ बीमा कम्पनीलाई कारवाही गरेको हो ।

प्राधिकरणको कारबाही पर्ने कम्पनीहरूमा नेपाल लाइफ इन्स्योरेन्स, एसियन लाइफ इन्स्योरेन्स, नेपाल पुनर्बीमा कम्पनी, हिमालयन रि इन्स्योरेन्स, नेको इन्स्योरेन्स, हिमालयन लाइफ, ओरियन्टल इन्स्योरेन्स र एलियन्ट इन्स्योरेन्स ब्रोकर कम्पनी रहेका छन् ।

नेपाल पुनर्बीमा कम्पनीका सीईओ सुरेन्द्र थापालाई संस्थागत सुधारका लागि सचेत गराउने वा निर्देशन दिने प्रकृतिको कारबाही गरिएको छ भने एलियन्ट इन्स्योरेन्स ब्रोकरलाई तीन महिनाका लागि निलम्बन गरिएको प्राधिकरणले जनाएको छ ।

त्यस्तै, बाँकी बीमा कम्पनीहरूलाई भने प्रचलित बीमा ऐनको व्यवस्थाअनुसार जनही दुई लाख रुपैयाँका दरले जरिवाना गरिएको प्राधिकरणले जनाएको छ ।