काठमाडौँ । सरकारले नेपालमै मल कारखाना खोल्ने प्रतिबद्धता व्यक्त गरेको छ । ६ राजनीतिक दलको घोषणापत्रमा आधारित रहेर सार्वजनिक गरिएको ‘राष्ट्रिय प्रतिबद्धता’मा सरकारले यस्तो प्रतिबद्धता गरेको हो । 

हरेक वर्ष कृषकले भोग्दै आएको मल अभावको समस्या समाधान गर्न सरकारले निजी क्षेत्रसँगको सहकार्यमा नेपालमै रासायनिक मल कारखाना स्थापना गर्ने प्रतिबद्धता गरेको छ । 

प्रतिबद्धतामा सरकारले कृषि उद्यम तथा उद्योगलाई विशेष प्राथमिकता दिई कर छुट, भन्सार सहुलियत तथा लगानी प्रोत्साहन उपाय अवलम्बन गर्ने उल्लेख गरेको छ ।

त्यस्तै, कृषिलाई प्राथमिकता दिँदै किसानलाई क्रेडिट कार्ड, बीमा र सहुलियत ऋण उपलब्ध गराउने पनि घोषणा गरेको छ । अर्कोतर्फ सरकारले योगदानमा आधारित किसान पेन्सनका साथै किसान परिचयपत्रका आधारमा वास्तविक किसानलाई मात्र अनुदान ऋण, सेवा सुविधा र सामाजिक सुरक्षा उपलब्ध गराउनेसमेत प्रतिबद्धता गरेको छ ।