काठमाडौँ । सिद्धार्थ बैंकले किर्ते गरेर आफूलाई फसाइएको भन्दै दिलिप सिंह ओली लगायतले पत्रकार सम्मेलन नै गरेपछि सिद्धार्थ बैंकले यस विषयमा विज्ञप्ति जारी गरेको छ । घटनाबारे बुझ्न मिडियाकर्मीहरुले पटक पटक फोन गर्दा पनि सूचना अधिकारीले फोन नउठाएको र मिडिया फेस गर्न नसकेको यो विषयमा चौतर्फी चर्चा भएपछि बैंकले विषयान्तर हुनेगरी विज्ञप्ति जारी गरेको छ । 

विज्ञप्तिमा बैंकमाथि लागेको आरोपको प्रष्ट जवाफ दिइएको छैन । बरु, पत्रकार सम्मेलन गर्ने दिलिप ओली आफ्नो कर्जा र निक्षेप ग्राहक नभएको भन्दै घटनालाई विषयान्तर गर्न खोजिएको छ । जबकि ओलीले आफूलाई सिद्धार्थ बैंकका कर्मचारीले फसाएको दाबी गरेका छन् र स्वयम् बैंकले दिएको पत्रमा पनि ओलीको नाम उल्लेख गरिएको छ ।

ऋण उठाउने नाममा बैंकमा आफ्ना कर्मचारीहरुले गरेको बदमासी छोप्न बैंकले आफ्ना कर्मचारीमाथि नियोजित प्रहार भएको दाबी गरेको छ । जबकि बैंकले आन्तरिक रुपमा यो केसमा संलग्न भएको आरोप लागेका कर्मचारीहरुमाथि आन्तरिक छानविन सुरु गरिसकेको छ ।

‘सूचना अधिकारीले खण्डनमा हस्ताक्षरसमेत गर्न मानेनन्’
बैंकले यो विषयमा मिडिया फेस नगर्ने र सामान्य विज्ञप्ति मात्र जारी गर्ने रणनीति लिएको र बैंकका कर्मचारीको थुप्रै ठाउँमा बदमासी भएकाले आफु खण्डन पत्रमा हस्ताक्षर नगर्ने र मिडियाको फोन पनि नउठाउने भन्दै प्रशन्न खड्काले अडान लिएको बैंकका मार्केटिङ विभागका एक कर्मचारीले जानकारी दिए । यो केसले कुनै पनि रुप लिन सक्ने र भोलि अनुसन्धान भए आफ्नो धारणा पनि विवादमा पर्ने भन्दै बैंकका सूचना अधिकारी प्रशन्न श्रेष्ठले फोन पनि नउठाउने र विज्ञप्तिमा हस्ताक्षर पनि नगर्ने अडान लिएका हुन् ।

जबकि बैंकले जारी गर्ने यस्तो विषयमा बैंकको आधिकारिक व्यक्तिको हस्ताक्षर र छाप हुने गर्छ । तर बैंकले मार्केटिङ विभागकी एक कनिष्ट कर्मचारीको नाममा इमेल पठाउन लगाएर हस्ताक्षर र छाप विनाको विज्ञप्ति पठाएको छ । ‘अहिले विज्ञप्ति जारी गरे जस्तो गर्ने, भोलि अफ्ट्यारो परे, तल पिंकी कुमारी नामधारी कर्मचारीले विना सहमति विज्ञप्ति पठाएको हो भन्ने योजना छ ।’ मार्केटिङ विभागका एक अधिकारीले अर्थ सरोकारसँग भने, ’भोलि कानुनी प्रक्रिया अगाडी बढे त इमेलमा थर नै नखुलाइएको पिंकी कुमारी नाम नै हाम्रो कर्मचारी होइन भन्न पनि मिल्यो । तर प्रशन्न सरले भने यस्तो विज्ञप्तिमा मलाई नफसाउनु भनेर हस्ताक्षर गर्न मान्नुभएन’

प्रकरण के हो भिडियोमा हेर्नुहोस्ः