काठमाडौँ । सार्वजनिक नहुँदै मौद्रिक नीतिको ड्राफ्ट अमुक व्यक्तिका हात-हातमा पुगेको भन्दै आर्थिक आर्थिक मिडियाहरुको संस्था इकोनोमिक मिडिया सोसाइटी नेपाल (इम्शन) ले विरोध जनाएको छ । इम्शनले एक विज्ञप्ति जारी गर्दै मौद्रिक नीति चुहाएप्रति विरोध जनाएको हो ।

आज सार्वजनिक हुन लागेको आर्थिक वर्ष ७८/७९ मौद्रिक नीति सार्वजनिक हुनु अगावै संचालकले सो नीति चुहाएका हुन् । संचालकको यस्तो कदम नेपाल राष्ट्र बैंक ऐन २०५८ को दफा ३८ को उपदफा १ विपरित रहेको छ । उक्त दफा अनुसार राष्ट्र बैंकका संचालकले पदीय रुपमा काम गर्दा प्राप्त हुन आएको कुनै प्रकाशित वा अप्रकाशित गोप्य जानकारी वा सूचना अरुलाई दिन वा सोको भेद खोल्नु हुँदैन ।

तर राष्ट्र बैंकले संचालकले आफ्नो पदीय मर्यादा विर्सदै मौद्रिक नीतिको विषयवस्तु नै केहि संचारमाध्यमलाई उपलब्ध गराएका हुन् । यद्यपि राष्ट्र बैंकमा रहेका कुन संचालकले सूचना चुहाएको भन्ने खुलेको छैन । संचालकमा गभर्नर महाप्रसाद अधिकारी, अर्थ मन्त्रालयका सचिव मध्य कुमार मरासिनी , डेपुटी गभर्नरहरु निलम ढुंगाना र बम बहादुर मिश्र, तथा अन्य सदस्यको रुपमा श्री राम पौडेल, रामजी रेग्मी, र डा. सुवोध कुमार कर्ण रहेका छन् ।