काठमाडौँ । बीमा समितिले ३५.४४ प्रतिशत जनसंख्यामा बीमाको पहुँच पुगेको जनाएको छ । समितिले चालु आर्थिक वर्षको आठ महिनामा बीमाको दायरा साढे आठ प्रतिशत भन्दा धरैले बढेर ३५.४४ प्रतिशत पुगेको जनाएको हो । जुन चालु आर्थिक वर्षको साउनमा बीमाको दायरा  २६.८९ प्रतिशत रहेको थियो ।

बैदेशिक रोजगार (म्यादी बीमा) सहित बीमाको पहुँच ३५.४४ प्रतिशत पुगेको समितिको तथ्यांकमा उल्लेख छ । बैदेशिक रोजगार बाहेक पनि बीमाको दायरा ७.६२ प्रतिशतले बढेर ३२.६१ प्रतिशत पुगेको छ । गत साउनमा बैदेशिक रोजगार बाहेक बीमाको दायरा २४.९९ प्रतिशत रहेको थियो ।

सरकारले चालु आर्थिक वर्षको बजेटमार्फत यस आर्थिक वर्ष भित्रै बीमा पहुँच एक तिहाई जनसंख्यामा पुर्याउने घोषणा गरेको थियो । सरकारको लक्ष्य अनुसार बीमाको दायरा भने चालु आर्थिक वर्षको ६ महिनामै पुरा भएको थियो । सरकारले चालु आर्थिक वर्ष भित्र पुर्याउने लक्ष्य भन्दा बीमाको दायरा २.११ प्रतिशतले बढी हो ।

बजेट सार्वजनिक गर्दै सरकारले चालु आर्थिक वर्षभित्र ३३.३३ प्रतिशत जनसंख्यामा बीमाको पहुँच विस्तार गर्ने योजना सार्वजनिक गरेको थियो । सोसंगै समितिले सरकारको लक्ष्य अनुसार दायरा विस्तार गर्न प्रदेश तथा स्थानीय सरकारसँग छलफल तथा अन्तकृया कार्यक्रमलाई तीव्रता दिइरहेको छ ।