काठमाडौं । बीमा समितिका अध्यक्ष सूर्यप्रसाद सिलवालले लगानी अनुरुपको प्रतिफल दिन नसक्ने र समयमै दाबी भुक्तानी गर्न नसक्ने कम्पनीहरूले अस्वस्थ प्रतिस्पर्धा गरी व्यवसाय गर्नुभन्दा मर्जर वा प्राप्ती मार्फत पूँजी बृद्धि गर्नेतर्फ ध्यान दिनु उचित हुने बताएका छन् । समितिको आयोजनामा जीवन बीमा कम्पनीहरूसँग ‘बीमकको पूँजी बृद्धि तथा मर्जरसम्बन्धी अन्तरक्रिया कार्यक्रम’ मा बोल्दै अध्यक्ष सिलवालले यस्तो बताएका हुन् । यस्तै बीमा कम्पनीहरूको चुक्ता पूँजी बृद्धिको निर्णय गरेर बीमा व्यवसायलाई व्यवस्थित, विकसित र नियमित गर्न खोजेको पनि प्रष्ट पारेका छन् ।
अध्यक्ष सिलवालले सक्नेले पूँजी बढाउनुपर्ने रनसक्नेले आफू जस्तैसँग अरूसँग मर्जरमा जानुपर्ने जस्ता अभिव्यक्ति दिएका छन । साथै पूँजी बृद्धिका लागि सहजीकरण गर्न र मर्जरमा जानेलाई सक्ने जति सुविधा दिन समिति तयार रहेको पनि बताएका छन् । यस्तै बीमा कम्पनीहरू व्यवसाय विस्तारका लागि स्थानीय तहसम्म पुग्नुपर्ने र पूँजी बृद्धिका लागि हकपद सेयरलाई प्राथमिकतामा नराख्न पनि आग्रह गरेका छन् । यता बीमा समितिका कार्यकारी निर्देशक राजुरमण पौडेलले बीमा कम्पनीहरूलाई पूँजी बृद्धिका लागि थप लगानी, बोनस सेयर, विदेशी साझेदारी, मर्जर वा प्राप्ति लगायतका विभिन्न विकल्प हुनसक्ने बताएका छन् ।
