काठमाडौं । नेपाल इन्भेष्टमेन्ट बैंक र मेगा बैंक मर्जरमा जाने भएका छन् । दुई बैंकका सञ्चालकबीच भईरहेको छलफल फाइनल भएसँगै मर्जरमा जाने भएका हुन् । कुनै अड्चन नआएमा एकसाताभित्रमा मर्जरको सम्झौतामा हस्ताक्षर हुने कम्पनीले जनाएको छ । नेपाल इन्भेष्टमेन्ट बैंक र मेगा बैंक १००ः९० अनुपातमा गाभिने भएका हुन् ।
मर्जरपछि इन्भेष्टमेन्ट मेगा बैंकको नामबाट कारोकार सञ्चालन हुने भएको छ । यस्तै बैंकको सञ्चालक समितिको अध्यक्ष अहिलेका इन्भेष्टमेन्ट बैंकका अध्यक्ष पृथ्वीबहादुर पाँडे हुने भएको छ भने प्रमुख कार्यकारी अधिकृतमा ज्योति पाण्डे हुने भएको छ । नेपाल इन्भेष्टमेन्ट बैंक र हिमालयन बैंकले गतवर्ष बैशाखमा मर्जरमा जाने सहमति गरेका थिए । तर हिमालयन बैंकको साधारणसभाले मर्जरमा जाने प्रस्ताव विशेष साधारणसभाबाट अस्वीकृत गरेको थियो ।
चैत मसान्तसम्मको वित्तीय विवरण अनुसार नेपाल इन्भेष्टमेन्ट बैंकको १ खर्ब ८० अर्ब निक्षेप रहेको छ भने मेगा बैंकको १ खर्ब ४७ अर्बको निक्षेप रहेको छ । यस्तैकर्जा नेपाल इन्भेष्टमेन्ट बैंकको १ खर्ब ७३ अर्ब र मेगा बैंकको १ खर्ब ५० अर्ब रहेको छ । चुक्ता पुँजी भने नेपाल इन्भेष्टमेन्ट बैंकको १८ अर्ब ३० करोड र मेगा बैंकको १६ अर्ब १२ करोड रहेको छ ।
