काठमाडौँ । नेपाल राष्ट्र बैंक बालुवाटार घेराउ गर्न पुगेका आन्दोलनरत लगानीकर्ताले गभर्नर महाप्रसाद अधिकारीलाई १९ बुँदे ज्ञापन पत्र बुझाएका छन् । १९ बुँदे माग पुरा गराउन विभिन्न दबाबमूलक कार्यक्रम गर्दै आएका लगानीकर्ताले आज केन्द्रीय बैंक अगाडि प्रदर्शनी गरेका छन् । पुँजी बजार सुधार संघर्ष समितिले विगतको एमाले सरकारले साढे तीन वर्ष अघि नै र वर्तमान अर्थमन्त्रीले दुई महिना अघि नै गरिसक्छु भनेका ५८ बुँदाका बाँकी काम तत्काल पुरा गर्नुपर्ने लगायतका १९ बुँदे माग समावेश गरेर गभर्नरलाई ज्ञापन पत्र बुझाएका हुन् ।
यता, १९ बुँदे मागसहित लगानीकर्ता तिलक कोइराला पाँच दिनदेखि नेपाल धितोपत्र बोर्ड अगाडि आमरण अनशन बस्दै आएका छन् । कोइरालाको समर्थनमा लगानीकर्ताले दैनिक रुपमा प्रदर्शनी गर्दै आएका छन् । लगानीकर्ताले जेठ २३ गते शेयर बजार सुधारको माग गर्दै नेपाल धितोपत्र बोर्डमा ज्ञापनपत्र बुझाएपछि नियमित रुपमा आन्दोलन गर्दै आएका छन् । जिल्ला जिल्लाका लगानीकर्ता पनि आन्दोलनमा होमिएका छन् । उनीहरुले पनि सम्बन्धित जिल्ला प्रशासन कार्यालयमा पनि १९ बुँदे ज्ञापन पत्र बुझाइसकेका छन् ।
