काठमाडौँ । पछिल्लो समय धेरै लगानीकर्ताहरुले भोगेको समस्या हो- आइपीओ भर्यो, पर्दैन । नपरे पनि बैंकले सीआश्वा शुल्क लिन्छ । १० वटा आइपीओ भर्दा कुनै पनि पर्दैन तर पैसा झ्वाम् । तर नेपालमा केहि बैंकहरु पनि छन्, जसले आइपीओ भर्दा पैसा लिंदैनन् । तर यसको सूची भने अव सानो भएको छ । यसअघि ग्लोबल आइएमई बैंक र मेगा बैंकले पनि आइपीओ भर्दा पैसा लिंदैनथिए । तर ग्लोबल आइएमई बैंकले केहि समय अगाडीबाट आइपीओ भर्दा पैसा लाग्ने नियम ल्याईसकेको छ भने मेगा बैंकले केहि दिनअघि मात्र यस्तो निर्णय गरेको हो ।
हो, अब मेगा बैंकबाट आईपिओ भर्दा पनि शुल्क लाग्ने भएको छ । यो बैंकले अव एक पटक आइपीओ भर्दा २५ रुपैयाँ लिन्छ । अथात ४ पटक आइपीओ भर्दा १०० रुपैयाँ झ्वाम् । अव मेगा बैंकमा खाता हुने र आइपीओ नि:शुल्क भर्ना चाहानेहरुले कि नबिल, कि एनआइसी एशिया, कि राष्ट्रिय बाणिज्य बैंकमा खाता खोल्नुपर्ने हुन्छ । यी तीनमध्ये राष्ट्रिय बाणिज्य बैंकको सेवा धेरैले ‘झुर’ भन्दै आएका छन् । आइपीओ भर्ने मामलामा धेरै गुनासो हुने गरेको राष्ट्रिय बाणिज्य बैंक छोडेर दुई बैंक रोज्ने हो भने ग्राहकलाई अव कि नबिल, कि एनआइसी एशियाको विकल्प छैन ।
